Pjesa e dytë e dokumentarit “Matchday” është në dyshim. Ky dokumentar, i shfaqur për herë të parë në nëntorin e kaluar dhe i prodhuar nga Rakuten, tregonte pamje të futbollistëve të Barcelonës në dhomat e zhveshjes dhe gjatë udhëtimeve të skuadrës.
Por, vetë futbollistët mbetën të pakënaqur nga pjesa e parë e këtij dokumentari, pasi atyre nuk i pëlqeu që u shfaqën disa pamje të caktuara dhe u ankuan që në montazh nuk u fshinë disa klipe që krijuan polemika. Për këtë arsye, në premierën e tij në Barcelonë, asnjë nga lojtarët e klubit katalanas nuk ishte i pranishëm.
Messi me shokë e kanë bërë të qartë që nuk duan të shfaqen pamje nga brenda dhomave të zhveshjes, por prodhuesit mendojnë se pikërisht ato pamje e bëjnë tërheqës dokumentarin. Për momentin, palët janë në diskutime që të gjejnë një zgjidhje.
Një nga videot që shkaktoi më shumë polemika nga dokumentari i parë ishte momenti kur futbollistët debatonin me trajnerin Valverde për të dalë për jetë nate në Nju Jork.
