“Ndërhyrjet e presidentit dy ditë para zgjedhjeve kur i shpalli luftë Amerikës e kanë dëmtuar opozitën në këtë proces zgjedhor”. Kështu u shpreh kreu i LZHK-së Dashamir Shehi në “Dita Jonë” në A2 kur u pyet për rolin e presidentit. Sipas tij nuk mund të marrë drejtimin e opozitës se nuk vjen nga opozita, por të bëjë deri në fund të mandatit rolin e presidentit dhe të mbrojë të drejtat.
“Presidenti nuk mund të marrë frenat e opozitës, se nuk është njeri i opozitës, nuk vjen nga opozita. LSI ka qenë edhe majtas dhe djathtas. Që presidenti të vetëshpallet kryetar i opozitës nuk më pëlqen fare. Mund të shpallesha dhe unë dhe unë do isha më i lezetshëm. Presidenti të bëjë presidentin deri në fund të kësaj legjislature. Disa nga ndërhyrjet e presidentit në procesin opozitar na kanë dëmtuar. Presidenti nuk mund të shpallë luftë. Opozita shqiptare, e djathta dhe PD, ne e kemi prurë Amerikën këtu dhe duam t’ua kujtojmë shqiptarëve. Dy ditë para zgjedhjeve nuk mund t’i shpallë luftë aleatit tonë strategjik, Amerikës, pavarësisht rrethanave apo se mund t’i kenë hyrë në hak presidentit. Nuk vihen në lojë këto në një popull emotiv. Presidenti bën mirë të mbrojë të drejtën dhe lirinë”.
I pyetur për nismën e socialistëve për shkarkimin e presidentit Ilir Meta, Shehi tha se opozita do t’i dalë për zot presidentit.
“Socialistët për sa kohë i bën letrat presidenti ne i dalim për zot Presidentit dhe institucionit të Presidentit. Gjysma e tyre nuk ka lexuar një libër se ç’është socializmi në Europë. I ftoj të gjithë të na presin me durim të mbarojë ky hetim se ka rëndësi jo thjesht sa vota ka marrë opozita, por a ka demokraci dhe a bëhen votime apo jo. Kemi kohë kemi një verë përpara të mendojmë qetësisht për më të mirën e opozitës. Pushteti nuk është thjesht ndryshim fytyrash, por duhet një lëvizje e qenësishme”.
“Opozita duhet të presë përfundimin e hetimeve për zgjedhjet, pastaj të analizojë vetveten”
Opozita duhet të presë përfundimin e hetimeve për procesin zgjedhor pastaj duhet të analizojë vetveten. Këtë mendim ndau në studion e “Dita Jonë” kreu i LZHK-së Dashamir Shehi, sipas të cilit, së pari duhet të analizohet deformimi i sistemit zgjedhor, deformimi kriminal i votës dhe deformimi teknik të votës. Ai thekson se ligji zgjedhor nuk është përfaqësues për vendin, ku fajtore bën edhe opozitën që e ka firmosur.
“Do të fillojë analiza ku kemi gabuar. Kush i deformon zgjedhjet brenda sistemit zgjedhor? PS ka 48.57% dhe merr 74 mandate. PS ishte e vetme në zgjedhje dhe ka marrë më pak se gjysma e votave dhe më shumë se gjysma e deputetëve. Në total ka marrë 77 deputetë derivat i një ligji që nuk është përfaqësues për vendin, një ligj i keq që kemi firmosur edhe ne për këtë ligj. Ky nuk është ligj përfaqësues për votën shqiptare. Kemi deformim të sistemit zgjedhor më pak se 50% e votës derivon mbi 70 deputetë. Kemi deformim kriminal të votës dhe deformim teknik të votës që janë 80 mijë vota. Do marrim të analizojmë këta faktorë me radhë ka kohë të mjaftueshme deri në shtator për t’u marrë me këtë punë”.
Për Shehin vota në këto zgjedhje u ble përmes dy mënyrave, punësimit dhe blerjes klasike mafioze. Por nëse e para mund të kapërdihej, thotë ai, e dyta është e rrezikshme për vendin. Sipas tij këtu janë bashkë mafia dhe shteti.
“Ka dy lexime, e para është që të mbyllen dhe në fund të hetohen, se po kërkojmë hetimet të dimë nga janë gjithë këto 80 mijë vota të pavlefshme nga dalin këto deputetë që nuk ua di njeri emrin as te partia e vet me 15 mijë vota, një lloj industrie që blen. Unë kam idenë që i blen votat blerja nëpërmjet punësimit, dreq e shejtan të cilën do ta kapërdija në rrethanat shqiptare një lloj klientelizmi dhe blerja klasike. Dhe kjo e dyta është e rrezikshme, e para është e pamoralshme, e dyta e rrezikshme dhe kompromentues e sistemit. Zgjedhjet e fundit në Siçili ngjanin me këto të Shqipërisë, por makineria nuk ishte kaq e madhe se kishte një grupim që ishte mafia dhe një shtet që mundohej me i dal përpara, kurse këto janë bashkë mafia e shteti”.
Shehi është për idenë e bashkimit të së djathtës, por shprehet se së pari duhen analizuar faktorët negativë që çuan në këtë rezultat dhe pse e djathta nuk arrin të krijojë demokraci të brendshme. Sipas tij Basha nuk mund të gjykohet pa përfunduar hetimet, pastaj duhet riparë pozicionimi i së djathtës, e cila shton ai, nuk mund të qëndrojë më mbi antikomunizmin, por duhet një qasje e re e saj.
“Ne nuk shohim diçka, ne shohim shumë, kemi kohë deri kur nisë parlamenti por do të donim që analiza të mbështetej te rezultati real zgjedhor. Nëse përtej kësaj, të dimë kush është rruga për të ndryshuar këtë realitet, por nuk bëhet të nesërmen e zgjedhjes që disa kolegë kanë filluar. Unë drejt idesë së bashkimit të së djathtës po shkoj, por njëherë duhet qetësuar ambienti politik brenda opozitës shqiptare. Duhet të marrim me radhë faktorët negativë që çuan në këtë rezultat, t’i bëjmë të qartë ndërkombëtarëve që nuk është kjo Shqipëria se ndryshe nuk është Bjellorusia dhe e treta në një proces politik që pse e djathta nuk është në gjendje të krijojë demokraci të brendshme, në vend të korrentit krijon fraksione. Ne duhet t’i japim këtë lloj frymëmarrje jo vetëm për Kollozin për hsumë Kollozë të tjerë intelektualë. Nuk kemi të drejtë të gjykojmë Bashën pa përfunduar hetimet. Ne nuk kemi raport zyrtar të OSBE, kemi dy muaj punë të vërtetojmë ç’është vjedhur, pastaj të gjejmë asetet e reja të së djathtës dhe asistuar të djathtës në një pozicion politik. Nuk mund të qëndrojë më mbi antikomunizmin. Duhet një përqasje e re për botën e biznesit dhe intelektualëve”.
Shehi thekson se opozita duhet të jetë e fortë, që tenton të ndërtojë shtetin shqiptar të barabartë për të gjithë.
“Duhet të jetë një opozitë që tenton të ndërtojë shtetin shqiptar edhe gjatë zgjedhjeve e pamë që mungonte shteti. Ne duhet të bëjmë shtetin shqiptar të barabartë për të gjithë shqiptarët. Ky e ka bërë shtetin e familjes së vet dhe 5 zullumqarëve të vet. Në listën e PS ky vendosi sipër atë që paguan paratë dhe ka mbrojtjen politike të Ramës. Kemi prova sa të duash, është logjika normale dhe formale e gjërave”.
Sa i takon thirrjes për bashkëpunim nga Rama, Shehi thotë se ky është një provokim që u bë edhe para zgjedhjeve, por ia arriti të neutralizojë LSI-në. Ai u bën thirrje edhe kolegëve opozitarë që janë joshur nga kjo ftesë e kryeministrit, që të kenë kujdes pasi beteja e së djathtës thotë ai është me moralin dhe çuarjen e Shqipërisë në BE, jo në Turqi.
“Është brenda linjës së Ramës se e provokoi edhe para zgjedhjeve dhe ia arriti që LSI ta neutralizojë. Ky lloj diskutimi që thotë Rama duket si perëndimor, është mkiklues për disa arrivistë për disa brenda PD. Sot unë shoh brenda PD që janë trishtuar jo se ka humb e djathta e demokracia por perspektiva se ky do bëhej drejtor i KESH-it. Kujdes kolegë opozitarë beteja jonë është me moralin dhe të drejtën të çojmë Shqipërinë në BE. Nëse duhet të çojmë Shqipërinë në Turqi unë jam kundër. Ne kemi nevojë për opozitë të fortë, jo lëmoshën e Ramës”.
