Një skenë që ndodhi në sytë e fotografëve dhe për një çast bëri xhiron e botës, ishte ajo, kur Papa Gjon Pali II u shemb në makinën e tij, në Sheshin e Shën Pjetrit përpara audiencës së gjerë. Dikush nga turma qëlloi me dy plumba dhe Papa u transportua në spital thuajse i vdekur. Ishte 13 maji i vitit 1981.
Njeriu që e qëlloi ishte Ali Agca. Por kush ishin orkestruesit? Cili ishte qëllimi për të parë Papën duke u shembur nën goditjet e armës? Dyzet vjet më vonë, sulmi ndaj Karol Wojtyla mbetet i pazgjidhur plotësisht.
Mes vuajtjesh të mëdha, Papa i mbijetoi atij sulmi dhe tha: “Një dorë e shkrepur, një dorë tjetër e devijoi plumbin”. Mjekët e Poliklinikës Gemelli ku ai u transportua nuk besuan se Papa Gjon Pali II mund të shpëtonte nga ai sulm, por pas 5 orë e gjysmë në operacion, i cili rezultoi i suksesshëm, Papa ishte i sigurt.
Menjëherë pas sulmit në Sheshin e Shën Pjetrit, Mehmet Ali Agca, i riu turk që qëlloi Papën, u arrestua, si edhe u sekuestrua arma që ai përdori. Ka ende pyetje se kush qëndron prapa sulmit. Duket e vështirë që “Ujqërit Gri”, organizata terroriste turke pjesë e së cilës është Ali Agca dhe ajo me qendër në Bullgari, të ishte në gjendje të organizonte vetë. Më 27 dhjetor 1983, Papa Wojtyla, në burgun italian të Rebibbia, vizitoi autorin Agca dhe e fali. Sulmuesi, gjatë viteve dhe gjykimeve të ndryshme, ka dhënë versionet e tij të shumta, shpesh kontradiktore dhe të pamundura, për të ngatërruar opinionin publik sa më shumë që të jetë e mundur. Hetimet ndoqën drejtimet më të ndryshme, por 40 vjet pas këtij sulmi ende nuk ka të vërtetë të sigurt. Sigurisht që Wojtyla ishte ‘i pakëndshëm’ në Evropën Lindore, e lidhur ngushtë me Bashkimin Sovjetik. Por provat në këtë drejtim nuk janë gjetur kurrë.
Nga ajo ditë mbetet një këmishë e bardhë e përgjakur e shpuar nga vrimat e plumbave. Është në kishëzën e Institutit të Bijave të Bamirësisë, në Boccea, një periferi e Romës, e ruajtur në një shenjtore. Relikja mbijetoi falë shpejtësisë së një infermiereje që ishte në sallën e operacionit dhe e pa atë të hidhej në një cep.
