Një 38-vjeçar në Peqin është arrestuar nga policia në kuadër të aksionit “Poligoni”, i cili kishte marrë peng dy persona dhe i kishte dhunuar.
38-vjeçari Seit Manahasa në bashkëpunim me K.M. 37 vjeç, të dy nga Peqini, morën peng në hyrje të qytetit dhe i mbajtën për disa orë shtetasin G.M. dhe shtetasen F.D. duke u hequr lirinë në një poligon inertesh. Këta të fundit ishin kërcënuar dhe keqtrajtuar nga dy pengmarrësit. Pasi u keqtrajtuan, autorët u morën edhe 12 mijë lekë të reja dhe i shantazhuan me qëllim që t’u jepnin një shumë parash prej 20 mijë euro.
Pas disa orësh, 38-vjeçari Manahasa i liroi dy personat që mbante peng. Kanë qenë vetë ata që shkuan në polici dhe bën denoncim. Pas verifikimeve, forcat e Policisë së Elbasanit të mbështetura edhe nga RENEA, organizuan aksionin për kapjen e Seit Manahasës, ndërsa bashkëpunëtori i tij K.M. është shpallur në kërkim pasi nuk u arrit të gjendej.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprat penale “Shtrëngimi me anë të kanosjes për dhënie pasurie”, “Vjedhja me dhunë” dhe “Heqja e paligjshme e lirisë” kryer në bashkëpunim.
Seit Manahasa është një emër i njohur për publikun dhe për autoritetet, pasi disa kohë më parë ka qenë i dyshuar si i përfshirë së bashku me babain në vrasjen e Emiljano Ramazanit, ngjarje e ndodhur më 20 korrik 2020 në qytetin e Elbasanit. Por më pas çështja ndaj tyre u pushua dhe u lanë të lirë.
