Motra e të ndjerit Egli Proga, i cili u dhunua për vdekje nga Denis Meçe ka hedhur akuza ndaj institucioneve të drejtësisë nga protesta e cila po zhvillohet në Tiranë për ngjarjen e rëndë, ku humbi jetën vëllai i saj.
Mes lotësh ajo ka deklaruar nga protesta se vëllai i saj u vra nga 4 kriminelë në bashkëpunim me njëri-tjetrin.
Ajo tha se vëllai i saj u dhunua nga 4 barbarë, ku një prej të cilëve u dorëzua në mënyrë të kontrolluar, ndërsa 3 të tjerët janë lënë të lirë dhe “kanë 9 ditë që pinë raki”.
Jonida Proga denoncoi edhe mungesën e provave dhe kamerave nga vendngjarja.
Mes lotëve ajo thotë se do të bëjë drejtësi për vrasjen e vëllait të saj.
“Ishte 9 gusht ku në këtë orë vëllai im Egli u gjet i vdekur pa asnjë shenjë jete. Vdiq në rrugë mes Pogradecit, vdiq i rrahur në kokë, në trup. Janë 4 vrasësit e Eglit. Unë jam juriste e di shumë mirë çfarë rolesh kanë bashkëpunëtorët. Prokuroria, gjykata dhe policia ta dëgjojnë mirë.
Egli u vra nga 4 kriminelë në bashkëpunim me njëri-tjetrin. Unë nuk akuzoj pa bazë vetëm sepse më ka vdekur vëllai me të cilin u rrita. I thashë prokurores se nuk mund ta bëjë drejtësinë e vëllait tim. Ai u qëllua nga 4 barbarë. Njëri prej tyre u dorëzua në formë të kontrolluar, të tjerët kanë 9 ditë që pinë raki. Kjo është drejtësia? Prokurorja që la barbarët të pinë raki u hoq nga çështja pas kërkesës sime.
Horri që ka marrë përsipër vrasjen është organizuar që ta marrë ai që të shpëtojnë të tjerët. Ky maskara kur u dorëzua në polici tha se Eglin nuk e preku fare me dorë.
Nuk ka dëshmitarë, kamera. Përse u dorëzua kur nuk ka prova? Sepse thanë se Egli vdiq nga pija?
Një nga vrasësit e vëllait tim fjeti gjumë dhe thirri avokatin për t’u dorëzuar. Ky maskara tha se Egli vdiq vetë, nuk e preku me dorë. Policia e pa për 30 minuta që lëngonte në rrugë dhe nuk e prekën me dorë. Maskarai që e vrau e pa dhe nuk e ndihmoi. Ai ka emër, Leonidha Guçe.
Ky është një trafikant që e njeh mirë policia e Pogradecit dhe ia njeh mirë bëmat. Kjo është drejtësia zoti drejtor? Egli nuk vdiq nga pija, por u qëllua nga 4 barbarë që kanë emra dhe mbiemër, por nuk dua të akuzoj nga sheshi asnjë se çdo gjë do ta bëj me letra e ligj, jo thjesht me fjalë. Doja t’u tregoja pak nga e vërteta dhe nuk do të hesht. Do hetoj edhe ata që nuk hetuan deri më sot”, tha Jonida Proga.
