Drejtuesi i Departamentit të IT-së në Policinë e Shtetit, Ervin Muça, ka reaguar pas akuzave nga opozita shqiptare se ai ka ndërhyrë në serverin e sistemit TIMS, duke marrë të dhënat me një USB.
Muça nëpërmjet një postimi në median sociale Facebook shkruan se e gjitha kjo është “një gënjeshtër”.
Sipas tij, të dhënat e sistemit TIMS, as janë transferuar, as janë tjetërsuar.
Për këtë arsye ai shprehet se është i gatshëm të përballet me akuzat dhe me këdo tjetër në organet e drejtësisë.
“’Bari ka ngjyrë blu-, tha gomari. Ai që i thoshte: E ke gabim, është i gjelbër -, dënohej, ndërsa gomari vazhdonte të pëlliste i lumtur për “fitoren”.
Unë nuk kam dashur prej kaq javësh të hyj në debat me asnjë gomar gënjeshtar. Por detyrimi ndaj publikut, ndaj detyrës, respekti ndaj vetes, miqve, kolegëve, më shtyn të mbaj këtë qëndrim të hapur për të gjithë baltën, shpifjet, akuzat, ngritur si tym në sy, e shpërndarë andej-këtej, ku mund të gjendet ndonjë gremç për t’u kapur.
1- Akuzohem, unë drejtues i lartë i Policisë së Shtetit, se paskërkësha marrë të dhënat e sistemit TIMS në një USB!!! GËNJESHTËR! GËNJESHTËR! GËNJESHTËR! Të dhënat e sistemit TIMS, as janë transferuar, as janë tjetërsuar. Porositësve për endjen e rrjetave të shpifjeve, u them vetëm se magjitë vudu në teknologji, nuk funksionojnë dhe do u kthehen kundër.
2- Kur unë marr besimin për kryerjen e një detyre, nuk e nis punën duke menduar “si do përfitoj”, por se si do të shërbej. Është punë edukate, morali, ndershmërie dhe burrërrie. Nuk e di a i kanë këto karakteristika endësit e rrjetave të shpifjeve. Si drejtues i Lartë i Policisë, që në ditën e parë kam kërkuar informacion të detajuar për çdo hallkë, pjesëz dhe segment që ka lidhje me përgjegjësitë e mia. Kjo është mënyra për të dhënë më të mirën, për të mbajtur drejt peshën që të është ngarkuar, e për të siguruar të dhënat që përmbajnë sistemet. Një ndër procedurat kryesore me punën e përditshme të sistemeve është back-up. Jetike për qëndrueshmërinë e sistemeve dhe rikthimin në funksion, në rast sulmesh a fatkeqësish (kujtoj sulmin kibernetik iranian, ku sistemet tona u ringritën pas asistencës se pakushtëzuar nga DART i Microsoft dhe partnerët tanë strategjikë SHBA).
Pikërisht për këtë, unë në vijimësi kam kërkuar informacion mbi mënyrën e kryerjes së proçedurës së back-up nga personat që e kishin detyrë funksionale. Vërejta se back-up, një proçedurë aq e domosdomoshme dhe e rëndësishme, nuk ishte kryer sic duhej. Kërkova të ribëhej. Dhe…vini re: Si përgjigje kam marrë sabotimin. Sigurisht që jam aq i përgjegjshëm sa të mos i bëj publikë këtu në këtë reagim emrat sabotues që guxuan të cenojnë detyrën, betimin, integritetin dhe qëndrueshmërinë e sistemeve, por patjetër që po përgatis raportin tim, për eprorët dhe organe të tjera ligjzbatuese.
3- Unë, sot, tani, me këdo përballë, specialist i mirëfilltë, apo edhe autodidakt mediatik, jam gati të shkoj në institucionet tona hetuese, dhe sigurisht që një ditë do të shkojmë, për të provuar katërcipërisht se puna ime, nuk ka kaluar kurrë asnjë milimetër përtej përgjegjësive që më ngarkon detyra, e jo më të bëhem aktor filmash 007 me “vjedhje” materialesh mijëra TB në USB xhepi. Duhet të jesh shumë injorant ta shkruash këtë, dhe kush e di sa injorant të ndërtosh skenarë të tillë.
4- Në fakt, nuk është vetëm njollosja e emrit tim ajo që më shqetëson. Është mbi të gjitha, mundësia se endësit e këtyre rrjetëzave të shpifjeve, mund t’ia hedhin pa lagur, duke fshehur të vërtetën dhe qëllimet e tyre të vërteta. Por për dijeni, po u kujtoj të gjithëve një fjalë të Budës: Ka dy gabime për rrugën e të vërtetës; të mos i shkosh deri në fund dhe të mos nisesh. Unë tashmë jam nisur. Deri sot gjithçkaje i kam shkuar deri në fund”, shkruan Drejtuesi i Departamentit të IT-së në Policinë e Shtetit, Ervin Muça.
Por çfarë ka ndodhur me sistemin TIMS?
Fillimisht ishte ambasada amerikane në Tiranë e cila i kërkoi Qeverisë shqiptare një hetim.
Konkretisht, i ngarkuari me punë i Ambasadës në Tiranë, H. Martin McDowell, zhvilloi një takim me ministrin e Brendshëm shqiptar, Taulant Balla, pas shqetësimeve mbi raportimet se ka pasur ndërhyrje në sistemin TIMS.
Fill pas kësaj opozita reagoi duke thënë se do të kërkojë ngritjen e një komisioni hetimor.
Opozita ka artikuluar dyshime për ndërhyrje të paligjshme dhe rrjedhje të dhënash nga sistemi TIMS, regjistri i hyrje-daljeve në pikëkalimet kufitare të vendit.
Ndërkaq është mësuar se Agjencia e Mbikëqyrjes Policore nga bërë një kallëzim në Prokurori.
Sistemi TIMS është një bazë të dhënash që administrohet nga Policia e Shtetit në cilësinë e kontrolluesit dhe hyrja në të duhet të jetë e autorizuar.
