Në qytetet e vendit nata e ndërrimit të viteve ka qenë një festë me fishekzjarre, jo vetëm të hedhur në mënyrë të organizuar nga bashkitë, por edhe nga individë, pavarësisht ndalimit të tregtimit të tyre.
Në Korçë ku ndërrimin e viteve e kanë pritur jo vetëm vendasit, por dhe vizitorë nga e gjithë Shqipëria, mesnata u ndriçua nga fishekzjarret e hedhura spontanisht nga qytetarët.
Festa e ndërrimit të viteve në Fier u shoqërua si zakonisht me hedhjen e fishekzjarreve. Në ndryshim nga vitet e tjera, këtë vit fishekzjarret ishin më të pakta si pasojë e ndalimit të përdorimit të tyre nga njerëzit e zakonshëm. Megjithatë në qytetin e Fierit fishekzjarret e pakta u hodhën nga vetë banorët, ndërkohë që nuk kishte organizim nga bashkia për hedhjen e tyre.
Vlora kremton me spektakël fishekzjarresh dhe një koncert festiv natën e ndërrimit të viteve. Në Lungomare pranë Sheshit, spektakli ka startuar prej orës 23 e 30 minuta për të kulmuar me spektaklin e fishekzjarreve në orën 00-00. Me numërimin mbrapsht të kryetarit të bashkisë Dritan Leli, dhe atmosferën e krijuar nga fishekzjarret, Vlora ka uruar Gëzuar vitin e ri 2019. Gjithçka ka vijuar më pas me koncertin festiv të vitit të ri, i ndjekur nga një numër i konsiderueshëm qytetarësh në Shesh. Ndërkohë që forca policore, zjarrfikësit dhe ambulanca kanë qenë në gatishmëri natën e ndërrimit të viteve.
Festa e vitit të ri në qytetin e UNESKOS, Berat, erdhi mes fishekzjarresh dhe një atmosfere të gëzueshme. Qytetarë të shumtë janë gjendur në pedonalen e qytetit për të numëruar sekondat e fundit të vitit 2018, duke pritur vitin e ri mes fishekzjarresh. Por atmosferës së vitit të ri nuk i munguan edhe shashkat, të cilat kanë qenë të pranishme duke stresuar qytetarët. Gjithsesi gjatë gjithë kohës policia dhe zjarrfikëset kanë qenë në gatishmëri .
Në Gjirokastër nata e ndërrimit të viteve është përcjellë me atmosferë më të zbehtë fishekzjarresh. Spektakli i dritave që zgjati rreth 5 minuta, u kontrollua nga bashkia prej kalasë së qytetit. Shumë pak fishekzjarre u ndezën në pjesë të tjera të qytetit, kjo edhe prej mungesës së tyre në treg.
Qindra banorë të qytetit të Shkodrës u mblodhën ne sheshin “Nënë Tereza” për të pritur ndërrimin e viteve. Ndryshe nga vitet e tjera , bashkia kishte organizuar hedhjen e fishekzjarreve në mënyrë të organizuar, që ndriçuan qiellin kur akrepat shënuan orën 00:00.
Forca të përforcuara policie si dhe zjarrfikëse, mbikëqyrën nga afër shfaqjen e fishekzjarreve, e cila vijoj për disa minuta pa asnjë incident. Pas hedhjes së fishekzjarreve, qytetarët iu drejtuan klubeve të natës për të festuar.
Edhe pse temperaturat shënonin nën zero, qytetarë, por dhe banorë të tjerë të ardhur nga fshatrat, nuk nguruan t’i bashkohen festës së ndërrimit të viteve në pedonalen e qytetit të Bulqizës. Pas fishekzjarreve, banorët iu drejtuan shtëpive apo lokaleve ku kishin prenotuar, për të vijuar festën. Ndërkohë burime nga spitali bëjnë me dije se gjatë natës së ndërrimit të viteve nuk ka pasur të aksidentuar nga fishekzjarret.
Të vetmit pacientë që janë drejtuar spital, kanë qenë ata që kanë konsumuar alkool, të cilët kanë marrë ndihmën dhe më pas janë larguar drejt familjeve. Burime edhe nga policia lokale e Bulqizës bëjnë me dije se gjatë natës së ndërrimit të viteve nuk është shënuar asnjë incident apo aksident./TCh
