Sot u bënë 20 vite nga fitorja historike e Shqipërisë me Greqinë më 4 shtator të vitit 2004 në një “Qemal Stafa” të mbushur plot e përplot nga tifozët e mrekullueshëm kuqezi.
Kuqezinjtë fituan 2-1 me gola të Edvin Muratit në minutën e 2-të dhe Ardian Aliajt në minutën e 11-të.
Ajo fitore mbahet mend jo vetëm sepse fituam një “derbi” të ndezur me fqinjët, por sepse Greqia vinte si kampione e Europës në Tiranë. Po atë natë në Greqi u vra sepse festoi me flamurin kuqezi edhe Gramoz Palushaj, djaloshi nga Kukësi që ishte emigrant në vendin fqinj.
Po ku janë sot heronjtë e asaj ndeshjeje?
Shqipëria ka ende një Strakosha në portë. Nuk është Foto, por i biri, Thomasi. Elvin Beqiri, ish-mbrojtësi i djathtë nga Shkodra, tanimë jeton në Kanada.
Lorik Cana e ka mbyllur me futbollin si rekordmeni i prezencave me fanellën kuqezi (93).
Besnik Hasi është trajneri i Meshelenit në Belgjikë. Adrian Aliaj jeton në Kroaci dhe është tashmë një menaxher futbollistësh i afirmuar.
Altin Lala jeton në Gjermani dhe ka hapur disa biznese, por merret gjithashtu edhe me menaxhim lojtarësh (është agjent i Rashicës).
Ervin Skela jeton në Gjermani, pjesë e klubit Eintraht Frankfurt, por tanimë si këshilltar dhe zbulues talentesh.
Edvin Murati jeton në Francë, është pjesë e trupit diplomatik në Paris dhe zotëron biznese, por merret edhe me menaxhim lojtarësh bashkë me vëllanë e tij.
Klodian Duro jeton në Tiranë dhe i është futur profesionit të trajnerit. Provoi edhe një eksperiencë në Big Brother. Florian Myrtaj jeton në Itali dhe shpesh herë bën komentatorin sportiv.
Igli Tare, pas një eksperience të gjatë si drejtor i Lacios, prej një viti është shkëputur nga pjesa aktive e futbollit dhe po i përkushtohet familjes dhe bizneseve në Shqipëri dhe Itali.
Fitorja solli një festë të jashtëzakonshme në rrugët e Tiranës, ku të gjithë shqiptarët dolën për të festuar deri në orët e para të mëngjesit, pasi Kombëtarja shqiptare fitoi me kampionët në fuqi të Europës.
Ndërkohë, ndeshja e kthimit në Greqi u fitua nga vendësit 2-0 në vitin 2005 dhe ajo do të ishte edhe përballja e fundit që Shqipëria dhe Greqia kanë patur, qoftë edhe për takime miqësore.
