Policia ka vënë në pranga një 28-vjeçar pasi është shkaktari i një zjarri që shkrumboi një hapësirë të pyllëzuar me shkurre dhe bimësi të ndryshme në fshatin bregdetar të Dhërmiut.
Sipas uniformave blu në orët e para të mëngjesit të së shtunës, i riu ka ndezur fishekzjarrë gjatë një eventi por shkëndijat të shtyra edhe nga era në zonë, bënë që të merrte flakë sipërfaqja e tokës me bimësi.
“Gjatë orëve të para të ditës së sotme, në fshatin Dhërmi, u mor njoftim për një vatër zjarri që përfshiu një sipërfaqe të pyllëzuar me shkurre dhe bimësi të ndryshme. Si rezultat i hetimeve dhe falë bashkëpunimit me banorët dhe pushuesit në zonën bregdetare, Stacioni i Policisë Dhërmi arrestoi autorin e dyshuar të kësaj zjarrvënie, shtetasin L. Xh., 28 vjeç. 28-vjeçari dyshohet se, gjatë një eventi në një subjekt privat në fshatin Dhërmi, ndezi fishekzjarre që shkaktuan zjarrin, duke dëmtuar një sipërfaqe të konsiderueshme me shkurre dhe bimësi.”
Materialet procedurale i kaluan Prokurorisë së Vlorës për veprime të mëtejshme, për veprën penale “Shkatërrim nga pakujdesia i pyjeve dhe mjedisit pyjor”.
