Juventus, Bayern Munich, Barcelona dhe tani Inter. Nga Italia në Itali, duke kaluar nëpër Gjermani dhe Spanjë. Specialisti i titujve, Arturo Vidal, ka goditur përsëri, duke shtuar një tjetër kampionat në vitrinën e tij tashmë shumë të pasur. Titulli i nëntë kombëtar në dhjetë vitet e fundit.
Një rrugë pothuajse e qartë ajo e mesfushori nga Kili, e njollosur vetëm në sezonin e kaluar, kur Barcelona e tij përfundoi e dyta në La Liga, pas Real Madridit të zakonshëm. Pastaj, përkundër marrëdhënies së shkëlqyeshme personale me Messin, erdhi lamtumira nga blaugrana-t dhe kthimi në Serie A, ku Conte e donte fort, duke kujtuar vitet e lumtura të jetuara së bashku me Juventusin.
Gjërat për Vidal dhe Interin nuk shkuan në të vërtetë ashtu siç shpresohej verën e kaluar, por rezultati përfundimtar ishte i njëjtë: triumfi dhe titulli në vitrinë. I pesti i “Mbretit Artur” në Itali, pas katër titujve radhazi, 2012-2015 me fanellën bardhezi, disa prej të cilëve janë bërë tatuazhe në lëkurën e tij, si një kujtim i përjetshëm.
Një tatuazh që në muajt e parë të Vidal tek Interi shkaktoi shumë diskutime, edhe për shkak se në fushë performancat nuk ishin në lartësinë e famës së tij. Në moshën pothuajse 34-vjeçare (do t’i mbushë më 27 maj) dhe pas shumë betejash, trupi i kilianit “paraqiti faturën”, duke e detyruar atë së pari të shtrëngonte dhëmbët dhe më pas të ndalonte për të zgjidhur një problem në gju, që e kishte munduar për disa kohë.
