Mbi 400 lloje lakuriqësh nate mund të përhapin viruse që janë të rrezikshëm për ne në të ardhmen. Dhe kjo është arsyeja pse është e rëndësishme të dimë se cilat specie duhet të mbajmë nën monitorim.
Për gati dy vjet, në imagjinatën e zakonshme, lakuriqët e natës nuk janë më vetëm ato kafshë të çuditshme që flenë me kokë poshtë, por mbi të gjitha ato që lejuan SARS-CoV-2, koronavirusin që shkakton Covid, të depërtojë nga kafsha te njeriu, edhe pse debati mbi origjinën e virusit mbetet ende i hapur. Për të parandaluar përhapjen e ardhshme dhe për të parandaluar çdo pandemi, është e rëndësishme të kuptojmë se cilat specie kafshësh janë duke pritur viruse që janë potencialisht të rrezikshëm për njerëzit.
Në këtë këndvështrim, parandalues është edhe një studim i botuar në “Lancet Microbe“, pjesë e një përpjekjeje më të gjerë kërkimore ndërkombëtare të quajtur Verena “Viral Emergence Research Initiative”, e cila synon të parashikojë se cilët viruse mund të infektojnë njerëzit, duke filluar nga cilat kafshë bartëse dhe në cilat vende në botë mund të ndodhë kapërcimi i specieve.
Në katër muajt e parë të vitit 2020, studiuesit kanë zhvilluar tetë modele të ndryshme statistikore të afta të parashikojnë se cilat kafshë mund të strehojnë betacoronavirus (një grup koronavirusësh përgjegjës për SARS dhe Covid). Çuditërisht, modelet që shfrytëzonin të dhënat në lidhje me ekologjinë dhe evolucionin e lakuriqëve të natës dhanë rezultate më të sakta se modelet më të avancuara, të cilat përfshinin më pak të dhëna për biologjinë e kafshëve. Në këtë drejtim, “nëse duam të identifikojmë këto viruse, fillimisht duhet të përvijojmë në detaje profilin e tyre”, nënvizon Colin Carlson, një nga autorët e studimit.
Modelet e zhvilluara nga studiuesit ishin në gjendje të identifikonin si rezervuarë të mundshëm të betakoronavirusit mbi 400 lloje lakuriqësh nate, të përhapura jo vetëm në Azinë Juglindore, por edhe në Afrikën Sub-Sahariane dhe hemisferën perëndimore.
“Është thelbësore të investohet në monitorimin e këtyre kafshëve, për të kuptuar se ku dhe kur betakoronaviruset e ndryshëm mund të bëjnë kërcimin e specieve”, thekson Daniel Becker, koordinator i studimit, i cili shpjegon se si kërkimi ofron “një listë të shkurtër të specieve kryesoreve të lakuriqëve të natës për t’u mbajtur në sy dhe për t’u studiuar më tej”.
