Fabrizio Dragosei- Corriere della Sera
Wagner nuk ka luftuar në Ukrainë për muaj të tërë, por ishte dhe është ende një element thelbësor për Rusinë në Lindjen e Mesme dhe veçanërisht në Afrikë. Dhe kjo trashëgimi, të cilën Yevgeny Prigozhin, u përpoq ta shpëtonte me udhëtimet e tij të fundit para vdekjes është në qendër të një mosmarrëveshjeje. Kush do të marrë kontrollin e kompanisë mercenare, edhe nëse zyrtarisht do të jetë nën direktivat e Ministrisë së Mbrojtjes? Dhe çfarë roli do të luajnë formacionet e tjera private që janë krijuar prej disa kohësh dhe ato që po lindin në momentin e fundit për të pasur një copë të tortës?
Ne e dimë se në një takim me vetë ish-kuzhinierin dhe me komandantët e Wagner-it të mbajtur më 29 qershor, Putin tha se mercenarët do të vazhdonin aktivitetin e tyre nën drejtimin e një lideri të ri/të vjetër, Andrey Troshev, hero i Rusisë, ish-kolonel i ushtrisë. Troshev është shefi i shtabit të Wagner-it, domethënë personazhi që drejtoi operacionet nën udhëheqjen e drejtorit ushtarak Utkin, themelues i së njëjtës milici dhe nën Prigozhin. Nga të tre ai është i vetmi i mbijetuar dhe edhe nëse disa komandantë e konsiderojnë atë gati tradhtar, ai duket se nuk ka rivalë, falë bekimit të Putinit. Prigozhin nuk e pranoi emërimin e presidentit në atë takim dhe kjo mund të jetë edhe një nga arsyet e vdekjes së tij.
Wagner kishte dhe pjesërisht ka ende operacione të rëndësishme në Siri, Libi dhe disa shtete afrikane, duke përfshirë Republikën e Afrikës Qendrore. Shufrat e arit të gjetura në selinë e Shën Petersburgut pas kryengritjes së dështuar të qershorit erdhën prej andej. Pakot e dollarëve vinin nga pagesa e udhëheqësve të cilëve Prigozhin u ofronte shërbime dhe armë, si kryekomandant i Bengazit, Khalifa Haftar. Prej disa kohësh ka pasur edhe milici të tjera private që janë përpjekur të imitojnë Wagnerin pas fillimit të Operacionit Special në Ukrainë. Dhe tani ata po dalin përpara, pjesërisht nën kujdesin e Ministrisë së Mbrojtjes, e cila ka hequr qafe rivalin e bezdisshëm.
Ndërkohë, kemi Redut, financuar nga miku i Putinit dhe ish-KGB, Gennadij Timchenko, i cili është bërë një biznesmen shumë i pasur. Pastaj Convoy (nga emri i gardës speciale të carëve) e krijuar nga Sergej Aksyonov, guvernatori i Krimesë i emëruar nga Putin. Janë duke punësuar njerëz të Wagner dhe po bëjnë publicitet në Vkontakte (Facebook-u rus) për të angazhuar ish-ushtarakë, atletë dhe punonjës sigurie duke iu premtuar një të ardhme fitimprurëse jashtë kufijve.
Ashtu si Redut, i cili u krijua për të mbrojtur uzinat e Timchenkos në Siri, formacione të tjera gjysmë private funksionojnë nën kontrollin e ushtrisë: Fakel, Potok dhe Plamya, të financuara nga Gazprom. Pra, Sokol dhe Sokol 2 financuar nga mbreti i aluminit Deripaska. Dhe grupi Patriot i ish-spetsnaz, trupa speciale. Disa nga këto kompani luftuan, ndërsa të tjerat nuk e panë kurrë frontin. Por tani është Afrika ajo që është në sy të të gjithëve, madje edhe atyre që nuk kanë qenë në lojë deri më tani.
Bosi çeçen, Ramzan Kadyrov, i hodhi ish-guerrilasit e tij në përleshjen e Ukrainës, por kurrë nuk formoi një milici të krahasueshme me Wagnerin. Tani ai provon me grupe që menjëherë iu vunë nofka TikTok sepse shihen vetëm në rrjetin e njohur social dhe jo në fushë.
Madje është edhe një kompani ultrasish të skuadrave të ndryshme të futbollit që lufton në Bakhmut e inkuadruar në ushtri që dëshiron të bëhet e pavarur nën udhëheqjen e njëfarë Stanislav Orlov, lider i huliganëve të Cska, ish-skuadra e Armatës së Kuqe.
