Kompania amerikane e bioteknologjisë Moderna ka paditur Pfizer dhe partnerin e saj gjerman BioNTech për shkelje të patentave në zhvillimin e vaksinës së parë Covid-19.
Kompania amerikane e bioteknologjisë pretendon se teknologjia mRNA u zhvillua përpara pandemisë. Aksionet e Pfizer ranë 1.4% ndërsa BioNTech ra me rreth 2%
Padia, e cila kërkon dëme të paspecifikuara financiare, u ngrit në SHBA dhe në Gjermani.
Pfizer tha se ishte “i befasuar” nga veprimi dhe do të mbrohej kundër akuzave.
Në një deklaratë, Moderna tha se Pfizer/BioNTech kopjoi dy lloje të pronësisë së saj intelektuale. Njëra përfshinte një strukturë mRNA që Moderna thotë se shkencëtarët e saj filluan ta zhvillonin në vitin 2010 dhe ishin të parët që vërtetuan në provat njerëzore në 2015.
Shkelja e dytë e supozuar përfshin kodimin e proteinës në pjesën e jashtme të vetë virusit.
“Ne po i ngremë këto padi për të mbrojtur platformën inovative të teknologjisë mRNA, të cilën e kemi nisur, kemi investuar miliarda dollarë në krijimin dhe patentuar gjatë dekadës para pandemisë Covid-19”, tha shefi ekzekutiv i Moderna, Stephane Bancel.
