Naim Mataj, xhaxhai i 33-vjeçarit të vrarë në Dragoç të Postribës ka thënë se Ramazan Mataj nuk ka pasur asnjë konflikt.
Në një prononcim për mediat, ai është shprehur se 33-vjeçari ishte kthyer nga Belgjika prej më shumë se 1 viti dhe kohët e fundit punonte në sektorin e ndërtimit në Ulqin.
Gjatë fjalës së tij, Naimi ka thënë se vendi ku ka ndodhur ngjarja me shtëpinë e viktimës kishte një distancë prej rreth 1 kilometri.
Prononcimi i plotë i Naim Mataj lidhur me vrasjen e nipit të tij, Ramazan Matajt:
Kur e ke marrë vesh për ngjarjen?
Naim Mataj: Ngjarjen e kemi marrë vesh tani në mëngjes.
A ka pasur probleme, a keni pasur dijeni?
Naim Mataj: Kërkund! Asnjë problem nuk e ka pasur.
Ku ka jetuar?
Naim Mataj: Në Dragoç.
A ka jetuar ndokund më përpara?
Naim Mataj: Po, përpara ka jetuar në Belgjikë, ka 1 vit e sa, por tani ka punuar në Mal të Zi. Ka punuar në Ulqin, mjeshtër në ndërtim.
A keni qenë në dijeni të ndonjë problematike?
Naim Mataj: Absolutisht! Ne nuk kemi fare. Ne e kishim ruajtur barkun e shpinën, por nuk kemi pasur me askënd.
A keni dëgjuar krisma mbrëmë?
Naim Mataj: Jo, nuk kemi dëgjuar. Por këtu njerëzit i kanë dëgjuar krismat.
Sa larg e ka shtëpinë viktima nga vendi i ngjarjes?
Naim Mataj: 1 kilometër.
A keni ndonjë apel ndaj strukturave të shtetit?
Naim Mataj: Apeli që keni prej Policisë, Policia nuk na la që ta shohim kufomën. Të paktën duke hyrë në ambulancë të na linte që ta shikonim.
A dyshoni ndokund?
Naim Mataj: Jo, ne nuk dimë asgjë fare. Nuk kemi pasur asnjë konflikt me askënd.
Sa fëmijë janë në familje?
Naim Mataj: 2 djem dhe 1 vajzë.
A ka qenë i martuar?
Naim Mataj: Jo.
Vëllai tjetër ku ndodhet?
Naim Mataj: Në Belgjikë.
33-veçari Ramazan Mataj u qëllua për vdekje me armë zjarri në drejtim të automjetit tip “Benz” që drejtohej prej tij mëngjesin e sotëm në rrugën e fshatit Dragoç.
