Organizata Botërore e Shëndetit (OBSH) i bëri thirrje Rusisë të martën të ndiqte udhëzimet ndërkombëtare në prodhimin e vaksinës kundër COVID-19, pasi vendi tha se do të fillojë vaksinimin e popullatës kundër virusit të koronës në tetor.
“Ndonjëherë studiuesit individualë pretendojnë se kanë gjetur diçka, që natyrisht është një lajm i jashtëzakonshëm”, u tha zëdhënësi i OBSH Christian Lindmeier gazetarëve.
“Por ekziston një ndryshim i madh midis gjetjes ose indikacioneve se një vaksinë po funksionon dhe një vaksinë që ka kaluar të gjitha fazat”, shtoi ai.
Vaksina ruse nuk është në listën e OBSH-së me gjashtë vaksina që kanë arritur në fazën e tretë të provave klinike.
Asnjë verifikim i pavarur
Autoritetet shëndetësore ruse njoftuan të shtunën se po përgatiten të fillojnë një vaksinim masiv kundër virusit të koronës në tetor.
Ministri i Shëndetësisë, Mihail Muraško, tha se mjekët dhe mësuesit do të jenë të parët që do të marrin vaksinën, dhe pastaj gradualisht pjesën tjetër të popullatës. Ai shtoi se prova klinike e vaksinës e zhvilluar në Rusi ka përfunduar dhe se miratimi i saj është duke u përgatitur.
Deri më tani, Rusia nuk ka dhënë të dhëna shkencore mbi atë vaksinë për vlerësim të pavarur, sipas agjencive.
Instituti i Kërkimeve Gamaleya për Epidemiologji dhe Mikrobiologji në Moskë njoftoi në maj se kishte zhvilluar një vaksinë, e cila thotë se krijon imunitet ndaj virusit të koronës pa efekte anësore negative.
