Edhe pse në kushte të këqija të motit, ka nisur protesta e opozitës në kryeqytet. Pritet që tubimi që ka synim bllokimin e rrugëve në Tiranë të zgjasë deri në orën 20:00.
Demokratët ndjekin të njëjtin skenar si protesta e mëparshme ku bllokuan disa pika kryesore në Tiranë. Sot ata janë të vendosur në rrugën pranë Bashkisë së Tiranës, te rrethrrotullimi i “Zogut të Zi”, tek sheshi “Wilson”, tek “Pallati me Shigjeta” si dhe tek kryqëzimi tek “Rruga e Elbasanit”, pranë Xhamisë së Namazgjasë.
Kjo do të jetë protesta e parë që Berisha del vetë në terren pas arrestit shtëpiak prej gati 1 viti.
Policia e Shtetit ka marrë masat e saj për këtë protestë. Uniformat blu thonë se garantojnë të drejtën për tubim, por theksojnë se bllokimi i akseve rrugore është vepër penale. Në rast bllokimi, efektivët janë udhëzuar që të devijojnë qarkullimin e mjeteve në rrugë alternative.
