Orges Bilbili u arrestua ditën e djeshme për shkak të guximit të një efektivi të forcave “Shqiponja”, i cili fillimisht i kërkoi një dokument identifikimi dhe pasi u kërcënua me armë qëlloi duke e plagosur të shumë kërkuarin.
Gjatë ditës së djeshme dhe sot, policia ka kryer kontrolle për të verifikuar se si kishte mundur që të jetonte në Tiranë pa u pikasur Orges Bilbili.
Orges Bilbili jetonte në Tiranë sëbashku me një bashkëpunëtor të tij i identifikuar dhe shpallur në kërkim për vepra të rënda penale nga policia.
Burime për ABC News kanë njoftuar se gjatë kontrollit të banesës policia ka sekuestruar një pistoletë dhe sende me vlerë.
Gazetarja Xhensila Kodra raporton se Bilbilit i është gjetur në portofol një dokument identifikimi i falsifikuar me stemën e policisë. Në banesë ndërkohë janë gjetur 900 euro, një armë dhe pasaporta e A.Kaloçit, personi me të cilin banonte i shumë kërkuari.
Sakaq edhe miku i Orges Bilbilit, A. Kaloçit, dyshohet se përdorte identitet tjetër.
Ndërkohë Orges Bilbili nuk ka dhënë ende dëshminë e tij, pasi gjendja e tij shëndetësore nuk është stabilizuar pas ndërhyrjes kirurgjikale ditën e djeshme.
Vrasje dhe zhdukje trupi, kush është i shumë kërkuari që strehonte Orges Bilbilin në Tiranë
Xhensila Kodra, gazetare e Abc News, tha se Bilbili jetonte në një apartament me qira në rrugën “Sitki Çiço” në Tiranë sëbashku me një person tjetër rreth të tridhjetave, i cili është me precedentë të theksuar kriminalë.
Gjatë kontrollit në banesë është gjetur edhe pasaporta e këtij të fundit si edhe veshje, të cilat po verifikohet nëse janë përdorur ose jo në ndonjë vepër tjetër penale.
30-vjeçari A. Kaloçit është emër shumë i njohur për policinë për shkak se akuzohet për veprën penale “Krime kundër njerëzimit”.
Kjo vepër penale parashikohet në nenin 74 të Kodit Penal dhe parashikon vrasjen e më shumë se një personi, zhdukje trupi, etj, dhe dënohet me jo më pak se 15 vite burg.
Dyshohet se A. Kaloçi ishte personi që strehonte Bilbilin duke e përdorur për qëllime të një organizate kriminale.
Personi në fjalë ka mundur të largohet nga banesa pasi mësoi se çfarë kishte ndodhur.
