Kancelari austriak, Sebastian Kurz, do të shtyjë Bashkimin Europian drejt futjes së një pasaporte të gjelbër për njerëzit që kanë mbrojtje ndaj koronavirusit.
“Ne kemi nevojë për një “pasaportë të gjelbër” për të gjithë ata që janë vaksinuar ose kanë imunitet”, u tha Kurz gazetarëve të mërkurën, përpara një samiti dyditor me udhëheqësit europianë mbi pandeminë.
“Ne kemi nevojë për liri për të udhëtuar përsëri brenda Bashkimit Evropian, pa marrë parasysh nëse është për arsye biznesi apo private”, shtoi Kurz.
Europa Qendrore është bërë zona më e nxehtë e kontinentit, me Austrinë që po përpiqet të përmbajë një shpërthim të variantit të ri të identifikuar së pari në Afrikën e Jugut dhe me Republikën Çeke fqinje që po përballet me mungesa të shtretërve në spitale.
Kurz tha se ai do të prezantonte propozimin e tij në samitin e BE, ku dhe shpreson për një zgjidhje evropiane. Nëse pasaporta e gjelbër nuk arrin të tërheqë mbështetjen e të gjithë bllokut, ai tha se ajo mund të prezantohet në një shkallë më të vogël.
Turizmi në Austri formon një pjesë të rëndësishme të ekonomisë së vendit, tha Kurz, dhe për këtë arsye ai beson se futja e një pasaporte të tillë të gjelbër është jashtëzakonisht e rëndësishme.
Por Franca dhe Gjermania, nuk janë për këtë ide, sepse arsyetojnë se vendimi për certifikatën do ta bënte të detyrueshëm vaksinimin dhe do të nënkuptojë diskriminim ndaj njerëzve të cilët për arsye të caktuara nuk lejohen ose nuk duan të vaksinohen.
Franca, e cila ka një lëvizje të fortë kundër vaksinimit, ka premtuar të mos detyrojë qytetarët e saj të vaksinohen dhe beson se ideja e pasaportave të vaksinimit është e parakohshme.
Disa destinacione përfshirë Seychelles, Qipron dhe Rumaninë tashmë kanë hequr karantinën për turistët në gjendje të provojnë se janë vaksinuar. Vende të tjera, të tilla si Islanda dhe Hungaria, janë të hapura për njerëzit që janë shëruar nga Covid-19.
Edhe Greqia po bën thirrje që Bashkimi Europian të miratojë “pasaportat” e vaksinës Covid-19 në mënyrë që të hapë turizmin dhe të lejojë zhvillimin e pushimeve verore.
Aktualisht, një certifikatë digjitale lëshohet për ata shtetas grekë që janë vaksinuar, por nuk është i detyrueshëm për të udhëtuar në Greqi.
“Qëllimi ynë është thjesht të lehtësojmë ata që kanë fituar imunitet nga ritestimi për Covid-19 kur të hyjnë në Greqi”, tha ai.
