Vendet e NATO-s, aleatë të Ukrainës kanë njoftuar dërgimin e armëve të avancuara të mbrojtjes ajrore në Kiev pasi kryeqyteti ukrainas u godit nga sulmet me raketa. Armatimi i premtuar nga Britania e Madhe, Kanadaj, Franca dhe Holanda përfshin raketa dhe radarë. Gjithashtu edhe Shtetet e Bashkuara të Amerikës kanë bërë premtuar që do të forcojnë mbrojtjen raketore të Ukrainës. Një sistem i teknologjisë së lartë nga Gjermania është tashmë në Ukrainë.
Këto premtime vijnë pasi aleatët e Ukrainës nga 50 vende janë takuar në selinë e NATO-s në Bruksel. Kievi e përshëndeti samitin si “historik”.
Mbretëria e Bashkuar do të dhurojë raketa të mbrojtjes ajrore, si dhe qindra dronë ajrorë për të mbështetur mbledhjen e informacionit dhe aftësitë logjistike të Ukrainës. Britania do të sigurojë gjithashtu 18 armë artilerie obusi përveç 64 armëve të dorëzuara tashmë.
“Sulmet e fundit pa dallim të Rusisë në zonat civile në Ukrainë kërkojnë mbështetje të mëtejshme për ata që kërkojnë të mbrojnë kombin e tyre. Këto armë do të ndihmojnë Ukrainën të mbrojë qiejt e saj nga sulmet dhe të forcojë mbrojtjen e saj të përgjithshme raketore”, tha Sekretari i Mbrojtjes Ben Wallace.
Në fjalën e tij pas takimit të Brukselit, Sekretari i Mbrojtjes i SHBA Lloyd Austin tha se “ne do të bëjmë gjithçka që mundemi për të siguruar që ukrainasit të kenë atë që kërkohet për të qenë efektiv”.
Presidenti francez Emmanuel Macron tha se Parisi do të furnizojë Ukrainën me sisteme të mbrojtjes ajrore. Në një intervistë për televizionin France 2, ai nuk specifikoi se cilat sisteme do të dërgoheshin. Por ai tha se funksioni i tyre kryesor do të ishte mbrojtja e popullatës nga dronët.
Holanda tha se do të dorëzonte raketa të mbrojtjes ajrore me vlerë 15 milionë euro. Ministrja holandeze e Mbrojtjes Kajsa Ollongren tha se sulmet ruse “mund të përballen vetëm me mbështetje të pandërprerë për Ukrainën dhe popullin e saj”.
Kanadaja premtoi të sigurojë më shumë se 47 milion dollarë kanadezë (34 milion dollarë; 31 milion £) ndihmë ushtarake, duke përfshirë komunikimet satelitore dhe kamerat e dronëve.
Britania e Madhe pritet të njoftojë së shpejti dërgesat e saj të armëve.
Presidenti Zelensky ka muaj që u kërkon aleatëve të Ukrainës që të ofrojnë sisteme të mbrojtjes ajrore për të krijuar një mburojë ajrore për Ukrainën.
Rusia i ka paralajmëruar herë pas here aleatët e Ukrainës kundër furnizimit të Kievit me armatime të avancuara, duke theksuar se kjo do t’i bënte ata pjesëmarrës të luftës që Putin nisi më 24 Shkurt në Ukrainë.
