Për herë të parë pas shumë e shumë viteve, kubanët dolën masivisht në rrugët e vendit për të protestuar kundër qeverisë komuniste të ishullit.
Protestuesit u mblodhën kryesisht në San Antonio de los Banos, në jugperëndim të Havanës, për të protestuar ndaj problemeve ekonomike dhe shtypjes politike në vendin me një parti, siç tregohet nga videot që qarkullojnë në median sociale.
Demonstrata të mëtejshme u zhvilluan në qytetet e Havanës, Holguinit, Matanzas, Camagueyt dhe Santiago de Kuba.
Vetë presidenti Miguel Diaz-Canel shkoi në San Antonio de los Banos dhe iu drejtua të gjithë kubanëve në televizionin kombëtar.
“Ne nuk do të heqim dorë nga sovraniteti dhe pavarësia e këtij vendi”, tha Diaz-Canel, i cili është president që nga viti 2019 dhe drejton Partinë Komuniste.
“Nëse ata duan të mposhtin revolucionin, ata do të duhet të kalojnë mbi kufomat tona. Ne u kërkojmë të gjithë revolucionarëve të dalin në rrugë dhe të mbrojnë revolucionin kudo”, theksoi Diaz-Canel.
Sipas kundërshtarëve të qeverisë, forcat e sigurisë goditën protestuesit.
SHBA paralajmëruan Havanën kundër përdorimit të dhunës ndaj protestuesve.
“Shtetet e Bashkuara të Amerikës mbështesin lirinë e shprehjes dhe do të dënojnë me forcë çdo dhunë ose shënjestër të protestuesve paqësorë që ushtrojnë të drejtat e tyre universale”, shkroi këshilltari i sigurisë, Jake Sullivan në Twitter.
Demonstrata të mëdha kundër qeverisë kubane janë të rralla.
Kohët e fundit, e ashtuquajtura lëvizje ”San Isidro”, e themeluar nga artistë, akademikë dhe gazetarë të opozitës për të protestuar ndaj censurës në Kubë, kanë organizuar protesta të shpeshta, duke tërhequr vëmendjen e ndërkombëtarëve.
Diaz-Canel mori detyrën nga Raul Castro si udhëheqës i Partisë Komuniste në muajin prill, që do të thotë se për herë të parë që nga fitorja e revolucionit në 1959, vëllezërit Castro nuk mbajnë më pozicione drejtuese në vend.
