Një 25-vjeçar ka rënë në prangat e Policisë në Fier pasi ka përndjekur, dhunuar dhe kërcënuar një 31-vjeçare.
Sipas asaj që bën të ditur Policia, 31-vjeçarja ka bërë kallëzim, pasi teksa udhëtonte me taksi në drejtim të Vlorës me familjen e saj ajo ndiqej nga autori me makinën e tij.
Në momentin e ndalimit të autorit, gjatë kontrollit në automjet shërbimet e Policisë kanë gjetur dhe sekuestruar një send në dukje armë zjarri pistoletë.
Bëhet e ditur se 25-vjeçari e përndiqte të renë prej 5 muajsh.
Njoftimi i Policisë:
Fier/ Përndoqi për një periudhë 5 mujore një shtetase, ushtronte dhunë fizike dhe e kanoste për jetën, vihet në pranga 25 vjeçari.
Specialistët për Hetimin e Krimeve në Komisariatin e Policisë Fier, pas kallëzimit të marrë nga një 31-vjeçare, banuese në Tiranë, e cila udhëtonte me taksi me familjen e saj në drejtim të Vlorës, dhe një shtetas po e ndiqte me automjetin e tij, menjëherë kanë organizuar punën duke bashkëpunuar dhe me shërbimet e Drejtorisë Vendore të Policisë Vlorë për kapjen e tij, pasi nga informacionet ky shtetas kishte lëvizur me automjet në drejtim të Vlorës.
Në bashkëpunim me shërbimet e Policisë Vlorë u bë e mundur lokalizimi, kapja dhe shoqërimi për në Komisariatin e Policisë Fier e shtetasit I.B, 25 vjeç, banues në Laç.
Në momentin e ndalimit, gjatë kontrollit në automjet shërbimet e Policisë gjetën dhe sekuestruan një send në dukje armë zjarri pistoletë, e cila do dërgohet në Institutin e Policisë Shkencore për ekspertim për të përcaktuar llojin e saj.
Nga hetimet paraprake rezultoi se 25-vjeçari për një periudhë 5 mujore e ka përndjekur, dhunuar e kanosur këtë shtetase.
Materialet procedurale i kaluan Prokurorisë për veprime të mëtejshme.
