Pasi fitoi Kupën e Italisë në finalen ndaj Atalantës, Juventusi luan sfidën e fundit të sezonit dhe ndoshta më të rëndësishmen, transfertën ndaj Bolonjës, ku fitoja është detyrim për të shpresuar për një vend në katërshen më të mirë të renditjes.
Trajneri Andrea Pirlo doli në konferencën e zakonshme për shtyp, ku vlerësoi maksimalisht sfidën me emilianët dhe theksoi se skuadra është e përgatitur si duhet për ta kaluar me sukses testin e “Dall’Ara”-s.
“Pas ndeshjes me Milanin ishim të vdekur, por jemi rritur bashkë me rezultatet dhe tani besojmë shumë te një vend në zonën Champions. Do të përqendrohemi vetëm te ndeshja jonë, që të fitojmë dhe të mos kemi pishmane. Më pas të shpresojmë që të ngecë edhe Milani, që të arrijmë objektivin”, deklaroi tekniku bardhezi.
E ardhmja e trajnerit te Juventusi është në dyshim të madh edhe nëse arrihet një vend në katërshe, megjithatë Pirlo nuk e fsheh dëshirën për të vijuar punën e nisur me bardhezinjtë verën e kaluar, teksa thekson se Ronaldon e sheh në Torino edhe sezonin e ardhshëm.
“Kam nisur me kënaqësi këtë punë dhe dëshiroj të vazhdoj projektin me klubin. Ndjej se kam bërë mjaft mirë punën time dhe jam me kokën lart, megjithatë nuk besoj se e ardhmja ime do të vendoset vetëm nga ndeshja me Bolonjën, pasi drejtuesit kanë ndjekur punën time në vijimësi. Sa i përket Ronaldos, e shoh shumë të përqendruar dhe me dëshirë për të fituar. Mendoj se do të jetë në Torino edhe vitin e ardhshëm”, tha Pirlo.
