Klered Bozhanaj, 42-vjeçari që plagosi policin e “Shqiponjave” në Tiranë dy ditë më parë, ka bërë deklarata kontradiktore para grupit hetimor, që ngrenë dyshime mbi shëndetin i tij mendor.
Bozhanaj ka thënë para hetuesve se “jam komandant i Pentagonit”.
42-vjeçari dyshohet se vuan nga probleme të shëndetit mendor.
Edhe drejtori i Policisë së Tiranës deklaroi pas plagosjes së policit se Bozhanaj vuan nga depresioni.
Për këtë arsye do të pritet përgjigjja e mjekëve për gjendjen e tij të shëndetit mendor.
Klered Bozhanaj plagosi me pistoletë policin e “Shqiponjave” Edlir Alleshi dy ditë më parë në zonën e Kinostudios në kryeqytet.
Bozhanaj u arrestua pasditen e së enjtes, 24 orë pas ngjarjes, pasi u rikthye në banesë. Një grup efektivësh që e mbanin nën vëzhgim shtëpinë, ndërhynë sapo Bozhanaj u shfaq në zonë. Atij iu sekustrua dhe pistoleta të cilën e kishte me fishekë në gojë gati për qitje.
Ngjarja është referuar në prokurori për vrasje e punonjësit të policisë e mbetur në tentativë.
