Rusia “nuk do të bjerë në të njëjtin kurth si Bashkimi Sovjetik, ekonomia e saj do të qëndrojë e hapur”. Deklaratën e dha Vladimir Putin duke folur përpara sipërmarrësve të rinj rusë. Presidenti rus shtoi se sfida që vendi ka përpara tani është të fuqizohet dhe më tej.
Gjatë fjalimit, Putin e ka krahasuar veten me Pjetrin e Madh, monarkun rus të shekullit të 18-të, duke lënë të kuptohet se e konsideron veten një “car”.
Gjatë fjalës së tij, presidenti rus, duket se pranon se lufta në Ukrainë ishte pjesë e një pushtimi perandorak. Në një takim me sipërmarrës të rinj dhe shkencëtarë, Putin u shpreh se po i kthente Rusisë territorin që i përket.
“Pjetri i Madh udhëhoqi Luftën e Veriut për 21 vite. Dukej sikur ai po luftonte me Suedinë dhe po pushtonte territore. Ai nuk po pushtonte asgjë! Ai po i merrte përsëri ato!”, tha Putin.
Me këtë deklaratë, Putin tentoi të bënte një lidhje të drejtpërdrejtë midis përpjekjes së tij për të pushtuar Ukrainën dhe luftës së Pjetrit të Madh kundër Suedisë. Ai vazhdoi të nënkuptojë se besonte se toka ukrainase së shpejti do të shpallej ruse dhe përfundimisht do të njihej si e tillë.
“Kur Pjetri i Madh vendosi kryeqytetin e ri në Shën Petersburg, asnjë nga vendet europiane nuk e njohu këtë territor si rus. Të gjithë e njohën atë si territor suedez”, shtoi ai.
