Një punonjës policie i Komisariatit Nr.4 në Tiranë është pezulluar nga detyra pasi nxori informacionin për një aksion policor për kapjen e disa autorëve të kultivimit të një parcele kanabisi.
Polici E.D. 38 vjeç me detyrë ndihmës specialist i policimit në komunitet në Komisariatin 4, u pezullua nga detyra me vendim gjykate pas referimit të rastit nga AMP.
Punonjësi i policisë njoftoi për aksionin njërin prej kultivuesve të parcelës me kanabis, për shkak të lidhjes së afërt familjare me të.
NJOFTIMI I AMP:
Agjencia e Mbikëqyrjes Policore (Rajoni Tiranë), pas hetimeve të thelluara të kryera bazuar në referimin e materialeve procedurale në Prokurorinë pranë Gjykatës së Shkallës së Parë Tiranë, ka ekzektuar masën e sigurimit personal me karakter ndalues “Pezullim i ushtrimit të një detyre a shërbimi publik”, të vendosur nga Gjykata e Shkallës Parë të Juridiksionit të Përgjithshëm Tiranë ndaj punonjësit të policisë E.D., 38 vjeç, me detyrë Nd/Specialist i Policimit në Komunitet në Komisariatin e Policisë Nr. 4 Tiranë, i dyshuar për kryerjen e veprës penale “Shpërdorim detyre”.
Vendimi i Gjykatës ka ardhur pasi nga veprimet hetimore të kryera nga AMP, janë siguruar prova dhe fakte, të cilat përbëjnë dyshime të bazuara se gjatë një operacioni të zhvilluar nga Komisariati i Policisë Nr. 4 Tiranë, në datë 11.06.2024, për identifikimin dhe kapjen e autorëve, posedues të një parcele ku kultivohej lëndë narkotike, ky punonjës policie, duke shfrytëzuar informacionin që kishte për shkak të detyrës, ka kryer veprime aktive për njoftimin e njërit prej autorëve, me të cilin kishte lidhje të afërta familjare, me qëllim shmangien nga përgjegjësia penale.
Vijojnë hetimet për dokumentimin e plotë me prova ligjore të veprimtarisë së dyshuar.
