Presidenti i Ukrainës, Volodymyr Zelensky, ka thënë se 40 ushtarë janë konfirmuar të vdekur, ndërsa me dhjetëra të tjerë kanë mbetur të plagosur, që prej fillimi i pushtimit rus.
Ndërkohë, Oleksiy Arestovych, këshilltar i presidentit, ka thënë se veç viktimave në radhët e ushtrisë, kanë mbetur të vdekur edhe 10 civilë.
Tanket ruse kanë mbërritur në Kharkhiv, që është qyteti i dytë më i madh në Ukrainë, pas Kievit.
BBC raporton se ka të dhëna të konfirmuara nga një zyrtar ukrainas për mbërritjen e tankeve në Kharkhiv.
Ndërsa Perëndimi po paralajmëron prej muajsh për një pushtim të mundshëm rus të Ukrainës, sulmi rus i të enjtes “po ndodh shumë shpejt”.
Ukraina ka ndërprerë zyrtarisht marrëdhëniet diplomatike me Rusinë dhe po shpërndan armë për këdo qytetar që do të mbrojë vendin.
Kjo, në kohën kur presidenti rus i bëri thirrje Ukrainës që të mos mobilizohet ushtarakisht.
ÇFARË DIHET DERI TANI?
Në një fjalim televiziv në orën 05:55 të mëngjesit me orën e Moskës, Presidenti rus, Vladimir Putin, deklaroi një “operacion ushtarak” në krahinën lindore të Ukrainës, Donbas.
Putin tha se Rusia po vepronte për vetëmbrojtje. Ai u bëri thirrje ushtarëve ukrainas të dorëzonin armët. Çdo ndërhyrje nga fuqitë e huaja kundër Rusisë do të ketë përgjigje të menjëhershme, tha Putin.
Kievi thotë se Rusia ka goditur me predha infrastrukturën ukrainase. Gjithashtu, thotë se ka rrëzuar disa avionë luftarakë rusë, deklaratë që mohohet nga Moska.
Karvanët me trupa dhe tanke ruse kanë hyrë në Ukrainë nga disa drejtime. Një karvan u fut edhe nga kufiri me Bjellorusinë, në veri të Kievit. Një tjetër nga Krimea, në jug. Gadishulli është gjithashtu pjesë e Ukrainës, por është aneksuar nga Rusia që në vitin 2014.
Në Kiev janë krijuar radhë të gjata me makina që duan të largohen nga kryeqyteti. Banorë të tjerë kanë kërkuar strehë në metro.
Ukraina ka shpallur ligjin Marshall. Ministri i Jashtëm, Dmytro Kubela, ka bërë thirrje për sanksione shkatërruese, përfshi edhe përjashtimin e Rusisë nga sistemi swift i transfertave bankare.
Çmimi i naftës u rrit në 100 dollarë për fuçi, për herë të parë në 7 vite. Monedha ruse, rubla, pësoi zhvlerësimin më të madh ndonjëherë kundër dollarit dhe euros.
