Gjashtë pedagogë janë vënë në pranga në Elbasan, ndërsa vijojnë kërkimet për një tjetër.
Policia njofton se ata kanë kaluar në provime në mënyrë të parregullt një studente.
Është arrestuar dhe 59-vjeçari Gazmend Hodaj i cili luante rolin e sekserit, duke marrë shumat e parave nga e reja.
Një ditë më parë, me urdhër të Prokurorisë u arrestuan pedagogët Ornela Bilali, Zyhra Gripshi, Adrian Shingjergji, Beatriçe Gani, Florinda Tarusha, dhe Monika Hodaj, ndërsa u shpall në kërkim Edlira Gugu.
Nga kontrollet e kryera në zyrat e pedagogëve, janë gjetur të gjitha tezat e provimeve të 31-vjeçares.
“Shpërdoruan detyrën duke përfituar para për të kaluar në provime studenten, vihen në pranga 6 pedagogë dhe vijon puna për kapjen e 1 tjetri. Në pranga edhe shtetasi i cili mori lekët për t’ua dhënë pedagogëve. Gjatë kontrollit u gjetën dhe u sekuestruan tezat e provimeve të studentes. Specialistët e Seksionit për Hetimin e Krimeve Ekonomike dhe Financiare, pas denoncimit të bërë në Prokurorinë pranë Gjykatës së Shkallës së Parë të Juridiksionit të Përgjithshëm Elbasan nga gazetarët e emisionit investigativ, për një rast të shpërdorimit të detyrës duke kaluar në mënyrë të parregullt në provime një studente 31 vjeçe me qëllim për të përfituar shuma parash, organizuan dhe finalizuan operacionin policor të koduar “Teza”.
Në kuadër të operacionit policor nën drejtimin e Prokurorisë u arrestuan në flagrancë shtetasit: M. H., 49 vjeçe, B. G., 58 vjeçe, F. T., 56 vjeçe, A. Sh., 61 vjeç, O. B., 50 vjeçe, Z. G., 37 vjeçe dhe G. H., 59 vjeç.
Gjithashtu, shpallën në kërkim shtetasen E. G., 51 vjeçe, pedagoge. Këta shtetas me detyrë pedagogë kanë shpërdoruar detyrën, duke kaluar në mënyrë të parregullt në provime një studente 31 vjeçe, me qëllim për të përfituar shuma parash të cilat i ka marrë shtetasi G. H.. Nga kontrolli në zyrat e pedagogëve u gjetën dhe sekuestruan në cilësinë e provës materiale tezat e provimeve të studentes. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Shpërdorimi i detyrës” dhe “Korrupsioni pasiv i personave që ushtrojnë funksione publike“, thotë Policia.
