Kreu i qeverisë Edi Rama në një reagim në Facebook ka bërë me dije se bankat duhet të hapin sportelet në dy fashat e reja orare që janë vendosur për lëvizjen e qytetarëve.
Rama shkruan se bankat duhet që të punojnë në oraret 06.00 – 10.00 në mëngjes dhe nga ora 16.00 – 18.00 pasdite.
“Bankat kanë hall se s’do iu shkojnë njerëz gjatë ditës në sportele, meqë nga nesër do të ndalohet lëvizja në këmbë nga ora 10.00 deri në 16.00?
Ta kuptojnë edhe bankierët se jemi në luftë dhe t’i hapin sportelet nga ora 06.00–10.00 në mëngjes dhe nga ora 16.00 – 18.00 pasdite!
Nuk kemi si ia bëjmë ndryshe, të gjithë duhet të bëjnë sakrificën e tyre të vockël në këtë luftë të madhe për të mbrojtur jetën!
Po të kishte bormbardime gjatë orarit të ndaluar çfarë do bënin bankat? E pra, fakti që nuk i shohim bombat që hedh armiku drejt nesh, nuk do të thotë se nuk jemi nën bombardim!“
