Në Samitin e Tretë të Diasporës mbajti fjalën e tij dhe kryeministri i vendit Edi Rama. Ai e nisi me simbolikën e veçantë të numrit 111, referuar përvjetorit të Pavarësisë së Shqipërisë, e duke theksuar se ky takim vjen në një moment historik.
“Shumë të nderuar miq, e të ftuar zonja e zotërinj! 111-ta, thonë se është një numër unik në llojin e vet, besëtytnitë e gojëdhënat flasin se 3 1-shat sëbashku simbolizojnë fuqinë transformuese të vendimit, për të tjerë 111-ta është numri i engjëjve apo shifra e perfeksionit të universit dhe pavarësisht kontekstit, kur 3 1-shat bëhen bashkë në kalendar apo ëndrra, të parët këshillojnë meditim dhe përqendrim tek emocionet pozitive, sepse ata mendonin se këto numra që u shfaqen njerëzve para janë sinjal i një momenti historik që ka ardhur, për jetën individuale apo kolektive. Me këtë ogur të mirë, unë kam kënaqësinë e madhe t’ju them të gjithëve dhe në mënyrë të posaçme Presidentes së Kosovës, përfaqësuesve të lartë të shqiptarëve në RMV, në Malin e Zi, në komunën e Preshevës, mirësevini të gjithë në Tiranë, në samitin e tretë të Diasporës, në agim të 111-vjetorit të Pavarësisë së Shqipërisë.”
Rama theksoi se ky takim në agim të 111 vjetorit të pavarësisë është një ogur i mirë për bashkimin e shqiptarëve.
“Ky takim dy ditor vjen me vetëdijen e plotë se në punimet e Samitit, të cilat zhvillohen intensivisht jashtë këtyre seancave të mëdha plenare, na është besuar mundësia që të komunikojmë së bashku për të shkruar një tjetër faqe të re për Shqipërinë dhe shqiptarët. Samiti është udhëkryq ku bashkohen të gjithë pavarësisht bindjeve dhe përkatësive politike, krahinore, si shqiptarë që kanë diçka për të thënë, për të dhënë për mënyrën si duhet t’i qasemi sfidave të botës ku jetojmë.”
Për të treguar se shqiptarët mund të arrijnë të bëjnë realitet çdo ëndërr dhe arrijnë çdo objektiv kur punojnë bashkë, Rama mori si shembull kualifikimin e kombëtares shqiptare të futbollit në Europianin 2024 që zhvillohet në Gjermani.
“Ky Samit ndodh pak ditë pasi njishat e Shqipërisë, Kosovës dhe RMV-së jo vetëm e çuan Shqipërinë në Europë, por na ritreguan se çfarë mund të bëjmë kur bashkojmë talentet, vullnetet, forcat dhe mbi të gjitha kemi një qëllim dhe strategji për të fituar. Së bashku asnjë objektiv nuk është i paarritshëm, asnjë ëndërr e pamundur. Nëse ka një mësim të madh që të gjithë mund të marrin nga të gjitha ata emra që na bëjnë ne krenar si shqiptar, është mësimi se të gjithë ata kanë pasur një ëndërr shumë më të madhe sesa mundësitë e tyre mund t’ua këshillonin dhe e kanë bërë realitet. Mira Murati, Dua Lipa, Altin Kadareja, Ermonela Jaho, Lorik Cana, Rita Ora, Igli Tare e me radhë janë emra të cilët kanë rrugë të ndryshme dhe kanë arritur në maja të ndryshme të botës, por të përbashkët kanë fuqinë për t’i shkuar deri në fund me çdo çmim realizimit të ëndrrës së tyre”.
