Në një intervistë për Rai News, kryeministri Edi Rama shfaqi edhe një herë vendosmërinë për të mos dhënë dorëheqjen dhe për të mos e çuar vendin në zgjedhje të parakohshme.
Në një intervistë për gazetaren italiane Laura Tangherlini kreu i qeverisë shqiptare thotë se ligji i zgjedhjeve është i tillë, që kush fiton qeveris dhe kush humb, kalon në opozitë. Rama vuri në dukje se është i gatshëm të dëgjojë opozitën dhe të dialogojë me ta, ama siç ai thekson, nuk mund të ndalë së qeverisuri vendin për shkak të krizave politike që krijon opozita.
“Kemi mazhorancën jemi më përpara në një mënyrë ekzemplare në të gjitha sondazhit, nuk mund të arrihet në një vend të thuhet: “Unë do bëj kamikazin nëse nuk më jepni atë që duam”, thotë Rama.
“Imagjinoni nëse ndodh në Itali ajo që po ndodh tek ne. Deputetët e opozitës heqin dorë nga mandati dhe braktisin parlamentin. Pastaj i kërkojnë qeverisë së zgjedhur nga qytetarët të largohet. Kjo nuk është më demokraci. Është tirani e minorancës. Ne jemi ngarkuar me një detyrë nga populli dhe e respektojmë”, tha Rama.
A e ndikojnë protestat imazhin e Shqipërisë dhe rrugën e saj integruese? Kryeministri thotë se po. “Ishin 3 orë protestë, që prishën imazhin e vendit”, i cili siç kreu i qeverisë thekson, “është në një periudhë të rritjes ekonomike”.
Një krahasim mes protestave studentore dhe protestave të opozitës? Rama tha se protesta e studentëve për një arsim më cilësor ishte një protestë e popullit, zëri i të cilëve u dëgjua nga qeveria. Ndërsa protestat e thirrura nga opozita e bashkuar, sipas tij, janë protesta të një establishmenti politik, që janë të dëshpëruar se nuk mund të fitojnë.
“Jemi gati të dialogojmë, por sigurisht që duhet edhe të qeverisim”, përfundon kreu i qeverisë intervistën për Rai News.
