Sot në kryeministri kreu i qeverisë Edi Rama ka prezantuar drejtuesen e re të Kadastrës Dallëndyshe Bici. I pranishëm në prezantim ishte edhe paraardhësi i saj, Artan Lame dhe drejtoresha e AKSHI-t, Linda Karçanaj.
Në fjalën e tij, Artan Lame ndërsa tregoi se të dielën ka ditëlindjen, shtoi se largimin nga kreu i Kadastrës po e konsideron si një dhuratë për këtë rast.
“Nesër kam ditëlindjen, kam edhe përvjetorin e asaj ngjarjes me shëndetin që kam pasur disa vitesh, këtë tërheqje e konsideroj si dhuratë për ditëlindje pasi kam nevojë të fokusohem te shëndeti dhe te vetja për pak kohë,” u shpreh ai.
Nga ana tjetër, kreu i qeverisë tha se sot është koha për një frymë të re, ndërsa paralajmëroi se do të ngrihet në Task-Forcë brenda Kadastrës për të gjithë punonjësit që abuzojnë me pozicionin e tyre.
Siç u shpreh Rama, për të, synim është që të “mbyllen të gjitha rrugët e kontakteve të drejtpërdrejta mes qytetarëve dhe Kadastrës.”
Kreu i qeverisë theksoi se prioriteti i drejtoreshës së re është të luftojë korrupsionin, duke shtuar se për zbatimin e plotë të ligjit dhe shmangien e çdo ndërhyrjeje në sistemin digjital të këtij institucioni do të ngrihet një task-forcë speciale.
Rama u shpreh se nuk do të tolerohet asnjë shkelje e ligjit.
“Shërbimi tani e tutje do të jetë online, është koha për një shtysë të re. Duhen mbyllur të gjitha sportelet. Nuk duhet të funksionojë më zona ndarëse. Drejtorja e re një nga detyrat që ka është që të merret direkt me një task forcë të brendshme për të çuar aty ku duhet të gjitha ata që kanë luajtur bishtin e institucionit për interesat e tyre. Drejtoresha e re duhet të luftojë korrupsionin.
Duhet një punë intensive për procesin e dhënies në dorëzim të tokave që janë jashtë rruzullit të 7501 në zonat e caktuara të vendit ku duhen dhe hapa të tjerë konkretizues. Në fund të ditës duhet futur menjëherë në punë shërbimi satelitor në mënyrë që puna e Kadastrës të marrë plotësisht dimensionin teknologjik. Natyrisht që problematika bazë mbetet stabiliteti dhe cilësia e burimeve njerëzore dhe në këtë aspekt kërkohet që Kadastra të vazhdojë të blindohet për të mos lejuar influencat e jashtme sepse është Banka më e rëndësishme e vendit. Askujt mos t’i shkojë ndërmend që Kadastra është një zyrë punësimi, por në këtë aspekt përgjegjësia është e përgjithshme dhe politike. Përgjegjësinë kryesore natyrisht e ka qeveria. E fundit që kam për ju, e kam për të gjithë ata që punojnë në administratën shtetërore lidhur me trimërinë dhe frikën. Se dëgjoj shpesh që janë trembur njerëzit dhe kanë frikë të firmosin, s’ka pse të ketë frikë nëse zbaton ligjin dhe është aty për t’i shërbyer vendit, njerëzve dhe për të garantuar që ligji është në funksion të njerëzve.
Në këtë aspekt, është e padiskutueshme që procesi i përpjekjes për të vendosur disa pika mbi i në raport me ligjin duhet të trembë ata që duan t’i bëjnë bisht ligjit dhe askënd tjetër. Për këtë dua të jemi të qartë që A-ja dhe Zh-ja e punës së Kadastrës, e punës së drejtores së re do të jetë cilësi dhe shpejtësi, pa alibira, por në zbatim të ligjit. Çdo futje duarsh në sistemet digjitale për të bërë truke dhe çdo futje e së keqes pas shpine të shtetit dhe ligjit nga cilidoqoftë nuk do të tolerohet, përkundrazi do të jetë prioritet i prioriteteve. Një task-forcë speciale do të ngrihet për këtë çështje. Ne u kemi premtuar njerëzve që do të kenë pronat e tyre të sigurta“, tha Rama.
Artan Lame dha dorëheqjen nga detyra si drejtor i Agjencisë Shtetërore të Kadastrës dy ditë më parë. Artan Lame prej vitit 2013 drejtoi ALUIZN-in, ndërsa nga viti 2019 mori drejtimin e Kadastrës Shqiptare, duke u bashkuar ALUZNI me Hipotekën.
Ndërsa Dallëndyshe Bici ka qenë më herët në krye të IKMT-së, kandidate për deputete, zv/ministre e Mbrojtjes dhe së fundmi sërish në krye të IKMT-së.
