Kryeministri Edi Rama ka reaguar pas lëndimit të ushtarëve të KFOR-it në veri të Kosovës. Në një postim në Twitter kreu i qeverisë thekson se përgjegjësia për plagosjen e tyre është e dhunuesve.
Rama shkruan se “lëndimi i ushtarëve të KFOR-it ngarkon me përgjegjësi të drejtpërdrejtë dhunuesit e tyre të verbër dhe fatkeqësisht lëndon Kosovën në sytë e aleatëve e miqve të saj të pazëvendësueshëm! Sa më shumë zgjatet ky konflikt i rrezikshëm dhe i panevojshëm, aq më shumë lëndohet Kosova!”.
Një kritikë pati edhe për president serb, Aleksandër Vuçiç që ekspozoi trupat ushtarake në kufi.
“Nga ky udhëkryq ku konflikti kthehet e rikthehet çdo vit si produkt i të shkuarës, me Serbinë që ekspozon trupat në kufirin ku fuqia e saj është e barabartë me zero dhe Kosovën që ekspozon ngurrimin e saj për të finalizuar dialogun, dilet vetëm me dialog e me aleatë të fuqishëm!”, thotë Rama që pati një kritikë edhe për homologun kosovar, Albin Kurti.
“Thirrja ime për t’i dëgjuar me vëmendje ata aleatë e për të mos u futur më thellë në shtegun jo vetëm të rrezikshëm, po edhe të kotë ku Kosova po lëndohet ndërkombëtarisht bashkë me ushtarët e KFOR-it që po lëndohen fizikisht, s’është thirrje ndërkombëtare po nevojë kombëtare!”, përfundoi Rama.
