Kryeministri Edi Rama ka publikuar në Facebook hartën e zonave të gjelbërta ku do të ketë lehtësim të lëvizjes nga e hëna.
Lehtësim do të kenë Qarku Dibër, Qarku Gjirokastër, zona e përbashkët e bashkive Pogradec, Prrenjas dhe Librazhd, zona e përbashkët e bashkive Sarandë, Himarë, Konispol, Finiq dhe Bashkia Divjakë.
Sipas Ramës, në zonat e gjelbërta automjetet private do të lëvizin pa autorizim nga ora 09.30 deri në orën 17.30, por me rregullin e vetëm 2 personave në makinë, nga i cili përjashtohen kategorikisht pensionistët”.
“Ndalohet rreptësisht hyrje-dalja në perimetrin e këtyre zonave. Pensionistët do të lëvizin lirisht në këmbë, deri në orën 08.30 dhe deri në këtë orë asnjë këmbësor tjetër përveç atyre që kanë autorizim për punë, ndalohet të dalë nga shtëpia. Nga ora 9.30 deri në 17.30 të gjithë të tjerët mund të dalin nga shtëpia. Kujdes! Ndalohet lëvizja në këmbë e më shumë se dy personave. Ndalohet rreptësisht qëndrimi në një vend i më shumë se dy personave dhe nuk lejohet frekuentimi i parqeve publike në 14 ditët e ardhshme”, shkruan Rama në Facebook.
Rama pati edhe një apel në fund për të gjithë qytetarët: “Apeli im për të gjithë qytetarët e këtyre zonave është që të bëjnë më të mirën, duke garantuar me sjelljen e tyre kushtet e sigurisë për veten e të tjerët, në mënyrë që të mos kthehemi mbrapsht për shkak të shkeljeve në këto zona dhe po ashtu, të ndihmojnë të gjithë Shqipërinë me shembullin e tyre pozitiv”.
