Një raport i publikuar nga Institucioni për Demokraci dhe Ndërmjetësim thotë se 89% e qytetarëve mendojnë se në radhët e policisë ka korrupsion. Sakaq, në raport ngrihet shqetësimi dhe për bashkëpunimin mes punonjësve të policisë dhe botës së krimit, madje duke prishur dhe provat.
Korrupsioni në radhët e Policisë së Shteti vijon të shihet me shqetësim nga qytetarët. Në një raport të publikuar nga Instituti për Demokraci dhe Ndërmjetësim thuhet se 89% e qytetarëve mendojnë se në Policinë e Shtetit ka korrupsion, por vetëm 6% e tyre e kanë denoncuar.
Ndër sektorët më problematikë në radhët e uniformave blu, të anketuarit shohin Drejtorinë e Antidrogës dhe Trafiqeve, Policinë Rrugore, Departamenti i Krimit Ekonomiko-Financiar dhe Policinë e Kufirit dhe Migracionit. Votimi i sondazhit është shoqëruar edhe me argumentimin sipas të cilit shkak për këtë nivel të lartë korrupsioni janë një sërë faktorësh, por kryesisht vjen për shkak të pagave të ulëta që marrin sot punonjësit e policisë.
Një tjetër shqetësim që vihet re në raportin e IMD është dhe lidhja e punonjësve të policisë me eksponentët e botës së krimit, madje duke prishur provat. 57% e të anketuarve nga publiku e mendojnë një gjë të tillë, ndërsa 61% të tjerë u dakordësuan me faktin se oficerët e policisë janë të përfshirë në aktivitete të paligjshme. Sipas qytetarëve fenomeni i korrupsionit më së shumti vihet re në gradat e larta të policisë sesa tek oficerët e rangut të ulët dhe të mesëm.
Ndërkaq, me shqetësim për publikun shihet edhe abuzimi me fondet apo ngritja në detyrë në Polici të Shtetit dhe meritokracia, për të cilat të anketuarit mendojnë se ndikon dhe politika.
Ky perceptim i qytetarëve në radhët e policisë vjen pak kohë pas publikimit të një tjetër sondazhi të financuar nga qeveria suedeze, ku thuhej se niveli i besimit në radhët e uniformave blu është rritur dhe se ka pasur gjithashtu një rritje të standardit profesional dhe rezultateve në luftën kundër krimit.
