Rusia e sheh Britaninë si një nga shënjestrat e saj kryesore në Perëndim, sipas një raporti të shumëpritur të Komisionit Parlamentar për Inteligjencë dhe Çështje të Sigurisë (ISC) mbi ndërhyrjen e pretenduar ruse në politikën e Londrës.
Raporti gjithashtu thekson se Britania e Madhe është në shënjestër të Rusisë për shkak të marrëdhënieve të ngushta me Shtetet e Bashkuara dhe për shkak se konsiderohet, siç thuhet në dokument, një pjesë qendrore e lobit antirus perëndimor.
Sondazhi i ISC përfshiu fushatat dezinformuese, taktikat kibernetike dhe migrantët rusë në Mbretërinë e Bashkuar.
Raporti prej 50 faqesh analizon veprimtaritë e Rusisë, përfshirë ndërhyrjen e mundshme në referendumin e Brexit 2016. Sidoqoftë, shumë nga detajet kryesore sekrete nuk do të publikohen, shkruan BBC.
Dokumenti duhej të publikohej në fund të vitit të kaluar, por atëherë qeveria e drejtuar nga kryeministri Boris Johnson u akuzua se po e vononte për shkak të zgjedhjeve parlamentare të dhjetorit.
