Pas ndeshjeve eliminatore të Euro 2020-ës dhe miqësoreve të fillim-shtatorit, FIFA ka publikuar paraditen e sotme renditjen e re të skuadrave Përfaqësuese.
Mbetet në të njëjtat pozita Shqipëria, në vendin e 64-t, pasi regjistroi një humbje në Francë dhe një fitore në Elbasan, ndaj Islandës, duke shtuar 10 pikë në totalin e përgjithshëm.
Kosova vazhdon të fitojë pozicione pas rezultateve të mira duke kapur vendin e 119. “Dardanët” fituan një pozicion pas fitores me Çekinë dhe humbjes me Anglinë. Ky është rezultati më i mirë i ekipit të Bernard Challandes në histori.
Ka ndryshime dhe në vendet e para, pasi Franca ka kaluar e dyta duke ulur Brazilin në vendin e tretë. Belgjika mbetet e paprekshme në vendin e parë. Anglia e pandryshuar në vendin e katërt, Portugalia ka fituar një pozicion duke ndërruar vendet me Uruguain. Spanja ka kaluar e 7-ta duke fituar dy pozicione. Holanda fiton 3 pozicione duke kaluar e 13, ndërsa Italia në vend të 15 e Gjermania mban vendin e 16.
