Në pritje të ideve më të qarta për zhvillimet e ardhshme të misionit Artemis – e ndërsa Japonia po pret uljen e sondës së saj SLIM në sipërfaqen e Hënën, Shtetet e Bashkuara kanë marrë një hap të ri, epokal në eksplorimin e satelitit tonë. Pas më shumë se 50 vitesh nga misioni i fundit Apollo 17, një raketë është nisur nga territori amerikan drejt Hënës.
Gara për pushtimin e Hënës hyn në një fazë të re. Nga baza amerikane e Cape Canaveral, nisi misioni Cert-1, i cili për herë të parë synon të dërgojë në Hënë një anije kozmike të ndërtuar nga një kompani private. Bëhet fjalë për sondën Peregrine, e ndërtuar nga Astrobotic, por që është kontraktuar nga NASA për të mbajtur 5 instrumenta shkencorë.
Ato do të studiojnë sipërfaqen e hënës përpara nisjes së misioneve njerëzore më vonë gjatë dekadës. Nëse do të rezultojë i suksesshëm ky do të jetë misioni i parë amerikan në 51 vite, që prej Apollos në vitin1972, që kompleton një ulje të butë në Hënë.
“Kemi dërguar shumë sonda në orbitë rreth hënës, por e kanë parë atë nga larg. Kjo do të jetë mundësia jonë e parë për t’u rikthyer dhe për të bërë matjet e nevojshme duke e prekur sipërfaqen e duke parë se çfarë ka atje vërtet”, thotë eksperti i NASA-s, Joel Kearns.
Peregrine është pjesë e një morie anijesh kozmike që do të përpiqen të pozicionohen në sipërfaqen hënore në 2024, në kuadër të gati 8 projekteve të ndryshëm, përfshirë nga Japonia dhe Kina. Anija Kozmike u lëshua nga platforma 41e e Space Force Station, me raketën e fuqishme vullkan, e cila po ashtu është ndërtuar nga një bashkëpunim privat i Boeing me Lockheed.
Zbarkimi i sondës në Hënë pritet të ndodhë më 23 shkurt. Ndërsa misioni Cert-1 fluturon drejt Hënës, anija kozmike japoneze Slim gjendet tashmë në orbitën hënore dhe më 19 janar duhet të ndodhë një zbarkim i paprecedentë i saktësisë së lartë në satelitin tonë natyror.
