Një gjykatë holandeze dënoi me burgim të përjetshëm dy rusë dhe një separatist ukrainas pro-rus me akuzën e vrasjes së 298 personave që vdiqën në vitin 2014 teksa udhëtonin me avionin e kompanisë Malaysia Airlines, në fluturimin MH17, mbi Ukrainë. Një rus u shpall i pafajshëm për shkak të mungesës së provave.
Gjykatësi Hendrik Steenhuis tha se provat e sjella nga dy prokurorët në gjyqin që zgjati dy vjet treguan se avioni Boeing 777 që udhëtonte nga Amsterdami në Kuala Lumpur u rrëzua nga një raketë të lëshuar nga ushtarë ukrainas pro-rusë, më 17 korrik, 2014. Avioni ra mbi një tokë bujqësore dhe trupat e viktimave u shpërndanë në një fushë me luledielli.
Në mesin e trazirave gjeopolitike që ka shkaktuar pushtimi rus në Ukrainë, gjykata vlerësoi se Moska kishte kontroll të plotë në rajonin separatist të Donetskut, në Ukrainën lindore, nga ku nisi sulmi.
Asnjë nga të pandehurit nuk u paraqit në gjyqin që filloi në mars të vitit 2020. Prokurorët kishin kërkuar dënime të përjetshme për të katërt. Prokurorët dhe të dyshuarit kanë dy javë kohë për të apeluar vendimin.
Gjyqtari Hendrik Steenhuis tha se avioni MH17 u rrëzua nga një raketë Byk, që u lëshua nga një fushë në veri të Ukrainës.
Para seancës, tensioni mes familjarëve ishte i lartë.
“E vërteta doli në dritë, kjo është më e rëndësishmja”, tha Anton Korre i cili humbi djalin, mbesën dhe nipin kur avioni ra. Robbert van Heijningen, që humbi vëllanë, kunatën dhe nipin e cilësoi rrëzimin e avionit një akt barbar që ai nuk do e hedhë kurrë pas krahëve, pavarësisht vendimit të gjykatës. “E kam gur në zemër”, tha ai.
Qindra familjarë të viktimave kishim udhëtuar për të dëgjuar vendimin e gjykatës.
Prokurorët holandezë thonë se raketa u lëshua nga Brigada e 53-të e Raketave Kundër-Ajrore, një njësi e forcave të armatosura ruse me bazë në qytetin rus të Kurskut dhe u kthye atje pas rrëzimit të MH17.
Të dyshuarit nuk akuzohen për hedhjen e raketës, por se kanë punuar së bashku për ta çuar atë në fushën ku u lëshua. Ata akuzohen për rrëzimin e avionit dhe vrasjen e të gjithë personave në bord.
I akuzuari më në moshë që u dënua ishte Igor Girkin, 51 vjeç, ish kolonel i Shërbimeve të Sigurisë së Federatës Ruse. Në kohën e rrëzimit të avionit, ai ishte Ministër i Mbrojtjes dhe komandant i forcave të armatosura në republikën e vetëshpallur të Donetskut, rajoni ku u rrëzua avioni. Raportohet se Girkin aktualisht është i përfshirë edhe në luftën e Rusisë në Ukrainë.
U dënuan gjithashtu edhe vartësit e tij, Sergey Dubinskiy dhe Leonid Kharchenko, një ukrainas për të cilin prokurorët thonë se ishte komandant i një njësie luftarake rebele pro-ruse dhe merrte urdhra direkt nga Dubinskiy.
Oleg Pulatovis ishte i vetmi nga të dyshuarit që u shpall i pafajshëm.
