Steven Seagal, një prej yjeve të filmave aksion të viteve 1980-1990, është vënë në shënjestër të kritikave, pasi i quajti të dyja palët e luftës në Ukrainë si një familje dhe fajësoi “entitete të huaja”, për përhapjen e propagandës kundër pushtimit rus.
Aktori 69-vjeçar, i cili është mik i Vladimir Putin dhe Alexander Lukashenko, dhe ka marrë nënshtetësinë ruse në vitin 2016, tha se shpresonte për një zgjidhje paqësore mes dy shteteve. Më parë ai ka mbështetur aneksimin e Krimesë nga Rusia, ndërsa gjatë një vizite disa vite më parë në Minsk, është parë duke ngrënë karota me Lukashnekon.
“Shumë prej nesh kanë miq e familjarë në Rusi dhe Ukrainë”, tha Seagal për “Fox News”. “I shoh të dyja palët si një familje dhe besoj vërtet se një entitet i huaj po shpenzon shuma të mëdha parash për propagandë, për të provokuar të dyja shtetet që të luftojnë kundër njëri-tjetrit. Lutjet e mia shkojnë për të dyja palët, që të gjejnë një zgjidhje paqësore dhe të jetojnë bashkë, në paqe”.
Komentet tërbuan komentuesit në rrjetet sociale. “Edhe unë i hedh në erë rregullisht familjarët e mi teksa flenë”, shkroi një ndjekës i tij në Twitter. “E mbaj mend mirë kohën kur xhaxhai im përdori bomba termobarike kundër meje pasi nuk pranuam të firmosnim hipotekën e shtëpisë”, shkroi një tjetër.
Vitin e kaluar, Seagal iu bashkua edhe partisë së Putin, që ka një numër të konsiderueshëm deputetësh në Dumën ruse.
