“Shefi”. Kështu e quajnë njerëzit e tij. Është emri i ri me peshë i botës së krimit shqiptar në kryeqytetin italian, Romë. Një emër i rëndësishëm, i rritur në krah të bosëve më të njohur shqiptarë në Romë, si Arben Zogu, Dorian Petoku dhe Petrit Bardhi.
Ai quhet Artur Ndreka i lindur në vitin 1987. Mbretërimi i tij përfundoi të hënën e kaluar. Një hetim i nisur nga prokuroria dhe Guardia di Finanza për trafik droge ka shkuar në fund. Ndreka tashmë ndodhet në burg së bashku me vëllain dhe njëkohësisht krahun e djathtë, Markun.
Fuqia e tij shtrihej në Romën jugore. Acilia dhe Vitinia ishin sheshet e trafikut të drogës ku, në krye të një bande prej 8 personash, ai shiste lumenj droge. Me 3 bosët historikë në burg, mafia shqiptare ishte në pozicion jashtë loje. Ndreka po ngjitej me shpejtësi majën e piramidës. Tashmë ai ishte “Shefi”.
Një pamje e qartë del nga përgjimet e financave në Piazzale Clodio. Kontrolli mbi territorin, shitja e drogës, hierarkia e ngurtë brenda grupit dhe kontaktet me bosët shqiptarë i jepnin forcë dhe prestigj brenda botës së krimit.
“Hetimet zbuluan pamjen e qartë të një qendre aktive të trafikut të drogës. Ajo vepronte në periferitë romake të Vitinia dhe Acilia, veçanërisht në ndërtesën në via Castel D’Aioni dhe në via Codigoro. Ato përdoreshin si vendtakime. Ishte i aftë për të lëvizur sasi të mëdha kokaine dhe hashashi. Kishte kontakte me personazhe të njohur për nivelin e tyre të lartë kriminal”, shkruan prokurorja Valeria Tomassini në urdhrin e arrestimit.
Hetuesit kanë përdorur një sërë përgjimesh për trafikun e drogës. “Bashkëbiseduesit e përgjuar besojnë se Arturi deri më tani ka arritur një status të lartë ekonomik dhe kriminal”, thuhet në dosje.
“Ndreka mund të mburrej me lidhjet e tij me Arben Zogun, Dorian Petokun dhe Petrit Bardhin, subjekte të një qarku shumë të fortë kriminal. Tashmë ata janë shkatërruar nga arrestimet e shumta. Ndreka përcaktohet nga familjarët e tij si “bosi”, shton prokurori.
“La Reppublica” shkruan se ishte një hetim delikat i koordinuar nga prokurori publik Carlo Villani. Ministri i Brendshëm, Matteo Piantedosi reagoi në Twitter ku komplimentoi hetuesit. “Operacion i Gdf. Sheshet e trafikut të drogës në Romë u mposhtën. Lufta kundër drogës është thelbësore për të luftuar përhapjen e krimit dhe paligjshmërisë”, shkruan ai.
