Kërcënimi se Rusia mund të përdorë potencialisht armë bërthamore taktike në Ukrainë nuk është diçka që mund të merret lehtë, tha të enjten drejtori i CIA-s, William Burns. Por ai shtoi se Uashingtoni nuk ka parë shumë prova praktike që e përforcojnë këtë shqetësim.
Këto janë disa nga komentet më të gjera që Burns ka bërë publikisht që kur Rusia nisi sulmin në Ukrainë më 24 shkurt. Ato nënvizojnë shqetësimet se sulmi më i madh kundër një shteti në Evropë që nga viti 1945, rrezikon të përshkallëzohet në përdorimin e armëve bërthamore.
Gjatë një fjalim të mbajtur në Institutin e Teknologjisë së Xhorxhias, William Burns tha se duke patur parasysh dëshpërimin e mundshëm të Presidentit Putin mbi ecurinë e luftimeve, pengesat me të cilat trupat ruse janë përballur deri më tani, askush nuk mund ta marrë lehtë kërcënimin e paraqitur nga një përdorim i mundshëm i armëve bërthamore taktike.
Armët bërthamore taktike i referohen atyre të prodhuara për përdorim në fushën e betejës. Disa ekspertë vlerësojnë se Rusia ka rreth 2000 të tilla, që mund të nisen nga forcat ajrore, detare dhe tokësore.
Ai tha gjithashtu se Putin është izoluar së tepërmi dhe kjo ka bërë që të mos i druhet më rrezikut. “Rrethi i tij i këshilltarëve është ngushtuar shumë, askush nuk ka bërë karrierë duke vënë në dyshim gjykimin apo kokëfortësinë e tij, si dhe besimin thuajse mistik se fati i tij është të rivendosë sferën e influencës ruse”, tha Burns.
Por sot Burns e quajti Kinën “një partner të heshtur të agresionit të Putinit kundër Ukrainës”.
Komentet e Burns ishin si përgjigje ndaj një pyetjeje nga ish-senatori amerikan Sam Nunn, një mbështetësit kryesor i politikave mbi kontrollin e armëve.
