Komisioni i Pavarur i Kualifikimit (KPK) shkarkoi nga detyra gjyqtaren e Elbasanit, Enkeleda Kapedeni.
Vendimi u mor pasi gjyqtarja nuk ka rezultuar e pastër pas procesit të vetingut.
Kapedani u hetua më parë nga ILD-ja për aktivitetin e saj në rrjetet sociale, me video të postuara kryesisht në TikTok, duke u pezulluar nga Këshilli i Lartë Gjyqësor.
Video “selfie” të postuara prej gjyqtares në mjediset e gjykatës, të shoqëruara me muzikë të papërshtatshme, u publikuan në media, duke ngjallur mjaft reagime për thyerje të Kodit të Etikës.
Në një video tjetër ajo filmoi veten duke dëgjuar në sfond një këngë ku dëgjohen fjalë si “Mafia” apo “Kolumbia”.
Po ashtu kryegjyqtarja reklamonte në TikTok veshjet e markave të shtrenjta, shoqëruar me komente pikërisht mbi markat, makinën e saj tip BMW dhe shfaqej duke drejtuar makinën me shpejtësi apo duke përdorur telefonin në timon, vepra të cilat janë të dënueshme edhe ligjërisht.
Për këtë arsye ajo u pezullua nga detyra për 6 muaj, duke marrë pagë minimale për këtë periudhë.
