Prokuroria e posaçme kundër Krimit të organizuar dhe Korrupsionit ka njoftuar këtë të premte sekuestrimin e pasurive të Princ Dobroshit dhe Olsi Syziut, dy persona të përfshirë në trafikun e kokainës nga vendet e Amerikës Latine drejt Gjermanisë.
Dy personat kanë lidhje krushqie me njëri tjetrin, pasi Princ Dobroshi ka për grua motrën e Olsi Syziut.
Por kush është Princi Dobroshi?
Dobroshi është një shtetas i Republikës së Kosovës, i cili aktualisht po hetohet nga autoritetet ligjzbatuese gjermane, për kryerjen e veprave penale “Trafikimi i paligjshëm i lëndëve narkotike në kuadër të grupit të organizuar kriminal”.
Gjatë vitit 2020 dhe më pas, ky shtetas së bashku me bashkëpunëtorë të tjerë, kishin planifikuar dhe kanë transportuar sasi të konsiderueshme lëndësh narkotike të llojit kokainë nëpërmjet rrugës detare nga Amerika e Jugut për në Gjermani.
Dobroshi i cili është etiketuar nga mediat në Kosovë si bosi i krimit ka një aktivitet të gjatë kriminal që daton që nga vitet 1990.
Në vitin 1993 ai u arrestua në Norvegji dhe u dënua me 14 vjet burg për trafik të heroinës, gjithashtu ishte i akuzuar në Suedi dhe Danimarkë.
Në një operacion të koordinuar mirë, ai u arratis në mënyrë spektakolare nga burgu Ullersmo në vitin 1997.
Pas arratisjes nga burgu në Norvegji, Dobroshi e vijoi aktivitetin e tij kriminal në Republikën Çeke, grupi i të cilit shumë shpejt dominoi trafikun e drogës.
Më 23 shkurt 1999 ai u arrestua përsëri. Këtë herë në kryeqytetin e Çekisë, Pragë.
Grupi i Dobroshit kishte planifikuar një sulm të armatosur në burgun e Pankrác, por në gusht 1999 ai u ekstradua në Norvegji për të përfunduar dënimin e tij.
Në janar 2005 Dobroshi u lirua me kusht për “sjellje të mirë” . Ai rikthye në Republikën Çeke dhe qëndroi atje për tre muaj deri sa i përfundoi viza e qëndrimit.
Më vonë, ai u kthye në Pejë, Kosovë.
Që nga shtatori 2006, ai jetonte në Kosovë, ndërsa gruaja e tij shqiptare dhe dy fëmijët e tyre jetonin në Pragë.
Dobroshit, po ashtu, i ishte ndaluar hyrja në vendet e Bashkimit Evropian.
Llogaritë e sekuestruara të Princ Dobroshit dhe kunatit të tij:
Dhjetë llogari bankare me gjendje në total rreth 133 000 (njëqind e tridhjetë e tre mijë) Euro;
Pasuria e paluajtshme e llojit godinë banimi, me adresë, “Gjiri i Lalzit”, Draç, Durrës, me sipërfaqe: kati përdhe 92 m², kati i parë 97 m², kati i dytë 55 m² + verandë me sipërfaqe 42 m² dhe sipërfaqe e përbashkët 576 m², në pronësi të shtetases S.R;
Pasuria e paluajtshme e llojit apartament me sipërfaqe 61.38 m², e regjistruar në emër të shtetasve Olsi Syziu, B.S, A.S dhe M.C (S), në Rezidencën “Kodra e Diellit”, Selitë, Tiranë;
Pasuri e paluajtshme e llojit apartament, me sipërfaqe 95.96 m², e regjistruar në emër të shtetasve Olsi Syziu, B.S, A.S dhe M.C (S), në Rezidencën “Kodra e Diellit”, Selitë, Tiranë;
Pasuria e paluajtshme e llojit apartament, me sipërfaqe 198.4 m2 banim, dhe dy poste parkimi, me sipërfaqe totale 234.1 m2 me adresë “Liqeni i Thatë”, Tiranë;
Pasuria e luajtshme automjet i markës “Volvo”, modeli “XC 60”, viti i prodhimit 2015, ngjyrë e zezë, në pronësi të shtetases A.S.
Shoqëria tregtare “SLAI”, me numër identifikimi tatimor (NIPT): M18330301H, me adresë në qytetin e Lezhës, si dhe me ortak të vetëm shtetasin Olsi Syziu”, njofton SPAK.
