Kryeministri Edi Rama ka reaguar pas polemikave që janë krijuar në Greqi lidhur me vizitën e tij në Athinë më 12 maj, ku do ta takohet me emigrantë shqiptarë.
Pas deklaratave të opozitës greke se kjo vizita është një veprim provokues në njëvjetorin e arrestimit të Belerit, si dhe reagimit të kryeministrit Kyriakos Mitsotakis që e cilësoi vizitën si “të panevojshme”, Rama shkruan se kjo vizitë s’ka lidhje me çështjet e brendshme të Greqisë, zgjedhjet e Parlamentit Europian në Greqi, apo ndonjë narrativë specifike që “mund të zgjojë interesin e politikanëve grekë”.
Rama thotë se vizita e tij ka qenë e planifikuar prej kohësh.
“Është mjaft befasuese të dëgjosh deklaratat e opozitës greke, ndërkohë që mund ta kuptoj plotësisht perspektivën e përcjellë nga kryeministri grek. Kontrasti i fortë në pikëpamjet për të njëjtën çështje hedh dritë mbi arsyen pse disa janë në opozitë, ndërsa të tjerëve u është besuar qeverisja nga populli.
Megjithatë, siç theksoi me të drejtë kryeministri Mitsotakis, Greqia mbetet një vend demokratik ku liderë nga vende të tjera demokratike mund të vizitojnë, të takohen me bashkatdhetarët e tyre dhe t’i lavdërojnë ata për punën e tyre të palodhur dhe kontributet e çmuara që ata japin jo vetëm për vendin ku ata jetojnë, por edhe në atdheun e tyre.
Vizita ime e ardhshme në Athinë të dielën, më 12, nuk ka lidhje me çështjet e brendshme të Greqisë, zgjedhjet e Parlamentit Evropian në Greqi, apo ndonjë narrativë specifike që mund të zgjojë interesin e politikanëve grekë, por që nuk janë në axhendën e qeverisë shqiptare. Kjo vizitë është pjesë e një serie vizitash të planifikuara prej kohësh në disa vende evropiane, përfshirë Athinën, për t’u angazhuar me shqiptarët që jetojnë jashtë dhe për të ndarë krenarinë e Shqipërisë për ta dhe Vision Albania 2030. Kjo ka të bëjë me vizitën time në fqinjin mik Greqinë”, shkruan Rama në rrjetet sociale.
Më herët për vizitën e Ramës në Athinë më 12 Maj ka folur edhe homologu i tij Mitsotakis që tha se “është e panevojshme”
