Nuk ndodh çdo ditë që një palë syze dielli mund të shkaktojnë rrënimin tënd. Por kjo i ka ndodhur një lideri të një partie të majtë norvegjeze që u kap nga kamerat duke vjedhur një palë syze luksoze nga aeroporti i Oslos.
Prestigjiozja “Politico Europe” rendit 12 rastet më të turpshme, ku politikanë, ish-kryeministra apo përfaqësues të BE, kanë shpërdorur detyrën në korrupsion apo dhe në afera seksuale që i kanë kushtuar postin.
Janë 12 histori absurde të përmbledhura si më poshtë.
Hajduti norvegjez i syzeve
“Galeotti” ishin një palë syze dielli të markës së njohur “Hugo Boss”. Deputeti norvegjez Bjørnar Moxnes, lider i partisë së krahut të majtë Rodt për një dekadë, rrëshqiti valixhen e tij në aeroportin e Oslos pa taksa, pasi hoqi etiketën e bar kodit. Gjithçka nën sytë e një kamere sigurie: imazhet u publikuan në mes të qershorit nga një gazetë norvegjeze.
Ai u ndalua në Gardermoen, pasi u zbulua se ai kishte dalë nga një dyqan në aeroportin e Oslos me syze të shtrenjta që nuk i kishte paguar.
Moxnes u përpoq të justifikohej me një “ishte një incident”. Më pas iu desh të pranonte të vërtetën në një postim në Facebook: “Shumë njerëz më kanë pyetur se si mund të kisha bërë një marrëzi të tillë. E kam pyetur veten shumë herë gjatë javëve të fundit. Nuk kam shpjegim adekuat”. Përveç se u arrestua, Moxnes humbi edhe punën: më 24 korrik ai njoftoi dorëheqjen nga posti i tij partiak.
Anglezi dhe video erotike
Deputeti konservator anglez Neil Parish, meriton një vend në podiumin e faljeve më absurde. Vitin e kaluar, në prill, ai u kap duke parë një video erotike në telefonin e tij celular në mes të një seance të Dhomës së Komunave.
Fillimisht e gjykoi “një moment çmendurie”, më pas shpiku se kishte përfunduar në atë faqe, ndërsa kërkonte informacione për traktorët në Google.
Në fund ai u dorëzua dhe pranoi se bujqësia nuk kishte të bënte me të dhe se me të vërtetë kishte kërkuar atë video. Dhe lamtumirë ulësja në Westminster.
Francezë, avionë dhe puro
Të shpenzosh 116,000 euro për të marrë me qira një avion privat që të çon në një vend që sapo është shkatërruar nga një tërmet?
Alain Joyandet, në atë kohë Ministër i Bashkëpunimit Francez, nuk mendoi se ishte një ide e keqe kur u ftua në një konferencë në Haiti disa javë pas tërmetit katastrofik të janarit 2010.
Joyandet (tani senator) u detyrua të jepte dorëheqjen , ashtu si edhe nënsekretari Christan Blanc, kur u zbulua se kishte shpenzuar 12 mijë euro (publike) për puro kubane.
Winston Churchill, për krahasim, ishte një fillestar. Madje Blanc bëri një justifikim të çuditshëm: “Nuk i kam pirë unë purot”. Pyetje: kush i pinte purot atëherë? Përgjigje: “Nuk e kam idenë”.
Anti-evazorë me kompani në ishujt Seychelles
Kampion i luftës kundër evazionit fiskal dhe përfundon i dënuar për mashtrim. Fati është cinik dhe mashtrues dhe ish-ministri francez i Ekonomisë, Jérôme Cahuzac, di diçka për të.
Pasi kishte krijuar një reputacion si një nga kritikët më të vendosur shkelësve tatimorë dhe parajsave fiskale, ai përfundoi në një skandal në vitin 2012 kur u zbulua se kishte një llogari bankare në Zvicër për njëzet vjet.
Sikur të mos mjaftonte kjo, në vitin 2016, “Panama Papers” zbuloi se ai zotëronte gjithashtu një kompani në ishujt Seychelles. Nga anëtar i qeverisë, përfundoi në burg dhe u dënua me dy vjet për mashtrim tatimor dhe pastrim parash.
Kandidati “qejfli”
Përmendëm rastin e Neil Parish më sipër. Në të njëjtën mënyrë i përket edhe ai i Benjamin Griveaux, bashkëpunëtor i ngushtë i Emmanuel Macron dhe kandidat i La République En Marche për postin e kryetarit të Bashkisë së Parisit në vitin 2020.
Griveaux nuk arriti as në votim. Ajo që e rrëzoi atë, ishin mesazhet dhe fotot eksplicite që i kishte dërguar një gruaje (një detaj: Griveaux ishte i martuar dhe kishte tre fëmijë) dhe të cilat në shkurt të atij viti u bënë virale në internet, pasi blogeri rus Piotr Pavlenski i kishte shpërndarë ato.
Në vitin 2021, Griveaux gjithashtu liroi vendin e tij në parlament dhe që atëherë ka rindërtuar karrierën e tij në sektorin privat.
Austriaku dhe mbesa e oligarkut
Fajësoi alkoolin Heinz-Christian Strache, zëvendës-kancelar austriak në kohën e skandalit, i cili më vonë hyri në histori si “Ibiza-Gate”.
Çështja ishte mjaft serioze: në vitin 2017, në mes të fushatës elektorale, Strache fluturoi në Ibiza për pushime.
Një mbrëmje ai takoi një grua të re ruse, e cila u prezantua si mbesa e një oligarku dhe i premtoi se do të investonte në një gazetë dhe më pas do ta zhvendoste në një linjë afër një partie të djathtë të bashkëbiseduesit të saj.
I cili në këmbim e siguroi atë se do ta favorizonte në dhënien e kontratave publike. Me përjashtim të faktit që gruaja ishte në fakt gazetare, por Strache nuk e vuri re, sepse ishte turbulluar nga pijet (kështu pohoi më vonë).
Rasti doli në vitin 2019: Strache u detyrua të jepte dorëheqjen dhe të tërhiqej nga politika, kancelari Sebastian Kurz të shpërndante qeverinë dhe të thërriste zgjedhje të parakohshme.
Hungarezi dhe festa gay
Në këtë listë episodesh absurde, ai me Yózsef Szájer meriton krenarinë e listës. Eurodeputet, anëtar për një kohë të gjatë i partisë hungareze Fidesz – të udhëhequr nga Viktor Orbán – i njohur për qëndrimet e saj konservatore veçanërisht për çështjen LGBTQ, karriera e tij përfundoi për shkak të një feste mjaft të pazakontë.
Mbrëmjen e 27 nëntorit 2020, në izolim të plotë, policia e Brukselit gjeti 25 burra të përfshirë në një takim seksual në grup.
Szájer u zbulua se ishte arratisur, duke zbritur nga banesa përmes një tubi uji dhe kur u ndalua në rrugë, oficerët i gjetën drogë në çantën e shpinës. Orbán e zhduku menjëherë nga jeta politike.”E papranueshme dhe nuk mund të mbrohet”.
Hajdutja spanjolle “e pavullnetshme”
Fatale për Cristina Cifuentes ishte një krem fytyre 40 euro. Në vitin 2018, presidentja e atëhershme e Komunitetit të Madridit u detyrua të largohej nga posti i saj pas publikimit të një videoje të vitit 2011, në të cilën ajo u filmua duke vjedhur produktin kozmetik në një supermarket.
“Një gabim i paqëllimshëm”, argumentoi ajo, e cila më pas pagoi atë që duhej. Por kur u shtuan disa akuza pak kohë më pas se ajo kishte gënjyer për diplomën e saj, ajo nuk kishte zgjidhje tjetër veçse të jepte dorëheqjen.
Slloveni i tradhtuar nga një sanduiç
Jo vetëm Cifuentes dhe Moxnes ishin fajtorë për vjedhje, por edhe parlamentari slloven Darij Krajcic, fajtor për vjedhjen e një sanduiçi në vitin 2019.
Në realitet, shpjegoi ai, po kryente një eksperiment social: i mërzitur nga fakti që nëpunësit e injoruan, ai ndjeu dëshirën për të provuar vetë se sa efektive ishte siguria e supermarketit.
Vjedhja nuk u zbulua në vend, por kolegët i kërkuan të jepte dorëheqjen (dhe të paguante sanduiçin e vjedhur).
Lamtumirë Komisionit
Në këtë rast, hapi prapa ishte një grup. Në vitin 1999, i gjithë Komisioni Evropian i udhëhequr atëherë nga luksemburgasi, Jacques Santer, dha dorëheqjen pasi një raport kishte ilustruar praktikat e “korrupsionit, shpërdorimit të pushtetit dhe mashtrimit”, të cilat ishin bërë një praktikë reale.
Në qendër të skandalit përfundoi veçanërisht ish-kryeministrja franceze Edith Cresson, e cila kishte të afërm, miq dhe madje edhe dentistin e saj të punësuar për poste të paguara bujare. Dentisti qëndroi në detyrë për 18 muaj, ku arriti të prodhonte një dokument të vetëm prej 24 faqesh…
Maltezi dhe lobisti
Gjashtëdhjetë milionë euro: ja çfarë një bashkëpunëtor i John Dalli-t, atëherë (ishte 2012) Komisioneri Evropian për Shëndetësinë, i kishte premtuar një kompanie suedeze të duhanit në këmbim të angazhimit për të shfuqizuar një ligj që ndalonte shitjen dhe përdorimin e “snus”-it, duhani i njomë pluhur, i cili konsumohet nga goja.
Dalli pretendoi se u detyrua të jepte dorëheqjen nga Presidenti i Komisionit Europian, José Manuel Barroso dhe e paditi atë.
Në vitin 2019, Gjykata e Përgjithshme e Bashkimit Evropian hodhi poshtë kërkesën dhe bashkë me të edhe kërkesën për dëmshpërblim.
Republika Çeke: një histori rozë me një fund të lumtur
Kjo histori e fundit mund të frymëzojë një skenar filmi. Republika Çeke, viti 2013. Kryeministri Petr Necas u detyrua të jepte dorëheqjen, pasi shefja e kabinetit të tij, Jana Nagyova u akuzua për korrupsion dhe shpërdorim pushteti.
Gruaja jo vetëm që përdorej për t’u dhënë ryshfet deputetëve, por ajo kishte udhëzuar edhe inteligjencën ushtarake për të spiunuar gruan e Neca-s. Po: kryeministri dhe bashkëpunëtorja e tij ishin të dashuruar.
Neca-s humbi punën dhe gruan e tij, por çdo e keqe e ka dhe një të mirë: disa muaj më vonë, ai u martua me Janën e tij të dashur.
