Pallati Elize ka zyrtarizuar një telefonatë ditën e sotme midis presidentit francez Emanuel Macron dhe homologun e tij rus, Vladimir Putin. Bëhet fjalë për telefonatën e tretë midis dy liderëve nga fillimi i konfliktit në Ukrainë.
Presidenti Vladimir Putin i ka thënë homologut francez Emmanuel Macron që Rusia do t’i arrijë objektivat që i ka vënë vetes gjatë operacionit ushtarak në Ukrainë, që janë demilitarizimi dhe statusi neutral i këtij vendi, sipas Kremlinit.
Kremlini thotë se këtë deklaratë Putin e ka bërë gjatë bisedës me Macron në telefon këtë të enjte, që zgjati rreth 90 minuta.
Putin gjithashtu ka thënë se përpjekjet e Kievit për të shtyrë negociatat vetëm sa do të shtonin listën e kërkesave nga ana e Moskës.
Heshtja franceze rreth telefonatës mund të nënkuptojë edhe një klimë të fortë tensioni midis dy presidentëve.
Pas Putinit, Macron morri në telefon edhe presidentin ukrainas Volodymy Zelensky, objektivin numër 1 për t’u eliminuar nga forcat ruse që po rrethojnë Kievin.
Këtë të enjte do të zhvillohet edhe raundi i dytë i bisedimeve mes Ukrainës dhe Rusisë, në Bjellorusi. Kërkesa minimale e Kievit është që të hapet një korridor humanitar në mënyrë që civilët të largohen nga zonat ku po zhvillohen luftime.
Ndërsa pozicioni i Rusisë nuk ka ndryshuar që nga dita e parë:
Ukraina duhet të “demilitarizohet” dhe të “denazifikohet”.
Gadishulli i Krimesë, i aneksuar nga Rusia në vitin 2014, duhet të njihet si pjesë integrale e saj.
Dy krahinat separatiste në Ukrainë, Repuvlika Popullore e Luhanskut dhe Republika Popullore e Donetskut, të njihen si të pavarura zyrtarisht.
