E pazakontë ajo që ka ndodhur në Francë në harkun e pak orëve. Vendi do të shkojë në zgjedhje të parakohshme, teksa Presidenti Emmanuel Macron në daljen për mediat pas mbylljes së kutive të votimit për zgjedhjet europiane ka njoftuar shpërndarjen e Asamblesë Kombëtare.
Partia e Macron është “shkërmoqur” në zgjedhje nga ekstremi i djathtë, i drejtuar nga rivalja e tij historike Marine Le Pen, dhe kreu i Elizesë për herë të parë që nga viti 1997 vendos të shpërndajë Parlamentin.
“Ky nuk është një rezultat i mirë për palët që mbrojnë Europën. Prandaj nuk mund të veproj sikur të mos kishte ndodhur asgjë”, tha kreu i shtetit në fjalimin pas disfatës historike.
Turni i parë do të mbahet më 30 qershor, i dyti më 7 korrik.
Pjesëmarrja vlerësohet në 52.5% të elektoratit dhe është pjesëmarrja më e madhe në zgjedhjet evropiane në 30 vitet e fundit në Francë.
Sondazhet e publikuara pak më parë në mediat franceze tregojnë se lista e Frontit Nacional të Marine Le Pen, e kryesuar nga Jordan Bardella, ka dalë në krye të rezultateve me më shumë se 30% të votave. Asnjëherë kjo forcë nuk ka arritur të marrë një numër kaq të lartë të votave sa kjo.
Partia “Rilindja” e presidentit Emmanuel Macron që kryesohej nga Valérie Hayer ka dalë e dyta me 15.2% të votave.
Ndërsa socialistët, nën drejtimin e Raphaël Glucksmann, kanë arritur të marrin 14%. “Reconquest” i ekstremit të djathtë të Eric Zemmour ka arritur 5.5%, ndërsa krahu i majtë LFI ka marrë 8.3%.
Duket se të Gjelbrit do të shkojnë vetëm në 5.2% – pak më shumë se 5% e nevojshme për të shkuar në Parlamentin Evropian. Pjesëmarrja në Francë ishte afërsisht 51%, pra pak më e lartë se 50.12% e vitit 2019.
Duke folur para mbështetësve, kreu i listës së Frontit Nacional, Jordan Bardella tha se francezët kanë dhënë një “vendim pa apel” duke i dhënë partisë së tij më shumë se 30% të votave. Kjo është më shumë se dyfishi i asaj që arriti të arrijë partia e Presidentit Macron.
“Ne e mirëpresim këtë vendim me përulësi dhe seriozitet. Bashkëqytetarët tanë francezë kanë shprehur dëshirën për ndryshim. Ky mesazh i qartë për liderët evropianë tregon vullnetin e francezëve për të parë që Evropa të ndryshojë kursin. Një erë shprese po fryn mbi Francë dhe është vetëm fillimi. Presidenti nuk mund të qëndrojë i shurdhër ndaj mesazhit të dërguar sonte nga populli francez”, tha Bardella.
Ai tha gjithashtu se presidenti Macron duhet të shpërndajë qeverinë dhe të thërrasë zgjedhje të përgjithshme.
