Vetëm tre muaj pasi u bë baba, Al Pacino është ndarë nga partnerja e tij Noor Alfallah, me të cilin ishte i lidhur që nga prilli i vitit 2022. Sipas faqes së internetit “The Blast”, Noor, 54 vjet më e re se ylli i Hollivudit, ka kërkuar kujdestarinë e djalit Roman Alfallah Pacino, dhe do të kishte paraqitur dokumente në gjykatën e Los Anxhelosit për të kërkuar kujdestarinë e fëmijës duke i dhënë aktorit “vizita të arsyeshme”.
Në moshën 83-vjeçare, Al Pacino e gjen veten sërish beqar dhe me një fëmijë të katërt (pas Julie 33-vjeçare dhe binjakëve 22-vjeçarë Olivia dhe Anton James). Sipas dokumenteve që ka parë “The Blast”, Alfallah ka përfshirë në kërkesën për kujdestarinë një faqe të quajtur “deklaratë vullnetare e prindërve” të nënshkruar nga të dyja palët: dokumentin, i cili është hartuar gjashtë ditë pas lindjes së fëmijës dhe është nënshkruar nga Al Pacino dhe një dëshmitar i palës së tretë, vërteton se aktori është babai biologjik i Romanit.
Sipas të njëjtave dokumente, Noor kërkon nga gjykata që të detyrojë Pacinon të paguajë të gjitha tarifat ligjore apo kostot që lidhen me këtë çështje. Për momentin nuk tregohet shuma e saktë e mbështetjes së fëmijës. Në Kaliforni është gjykata që duhet të përcaktojë zyrtarisht prindërit dhe të ardhurat e të dy palëve përpara se të urdhërojë mbështetjen e fëmijëve. Vetëkuptohet se në këtë situatë, duke marrë parasysh të ardhurat dhe pasuritë, Al Pacino do të jetë ai që do të paguajë një shumë mujore. Alfallah do të ishte gjithashtu e gatshme t’i jepte aktorit kujdestarinë e përbashkët ligjore të djalit të tyre, gjë që do t’i jepte atij një fjalë për çështjet që lidhen me arsimin, fenë, kujdesin mjekësor, apo dhe më shumë.
