“Një votë për mua, është një votë për ëndrrën amerikane”. Me këto fjalë, presidenti, Donald Trump, kërkoi mbështetje në Pensilvani për të fituar sërish drejtimin e Shtëpisë së Bardhë edhe për 4 vite të tjera.
14 ditë përpara votës presidenciale, Trump zhvilloi një tubim elektoral në një nga shtetet e rëndësishme, në të cilin mungoi zonja e parë, Melania.
Në momente të ndryshme, Trump lëshoi sulme ndaj rivalit demokrat, Joe Biden, duke e akuzuar se ka tradhtuar pritshmëritë e amerikanëve dhe se është në dorë të socialistëve dhe komunistëve të majtë.
“Këto janë zgjedhje mes rimëkëmbjes shumë të shpejtë të Trump, gjë e cila po ndodh tani, dhe depresionit Biden. Nëseai zgjidhet, ju do të keni një depresion, të cilin nuk e keni parë kurrë. E dini, ai do t’iu dyfishojë, trefishojë dhe katërfishojë taksat tuaja… Është një zgjedhje mes planit tonë për të vrarë virusin dhe planit të Biden për të vrarë ëndrrën amerikane.”, tha kreu i Shtëpisë së Bardhë, Donald Trump.
Edhe pse numrat tregojnë të kundërtën, presidenti amerikan u shpreh se pandemia koronavirus po shkon drejt fundit.
“Po shënojmë një kthesë në pandemi. 56% dhe është një rekord. Rritje e punësimit. Vaksina të sigurta që i japin fund shpejt pandemisë. Po mbaron dhe po kthehet jeta normale. Kjo është ajo që të gjithë duam.”
Ndërkohë, në kampin demokrat ish-presidenti amerikan Barack Obama i bashkohet sot fushatës së mikut të vjetër Joe Biden, duke nisur me një fjalim në Filadelfia.
Obama do t’i fokusojë përpjekjet e tij në mbështetje të ish zëvendës presidentit, në shtetet ku po zhvillohet votimi i parakohshëm. Ai do të ndalojë në disa prej atyre që konsiderohen si sheshbeteja vendimtare për zgjedhjen e fituesit.
Demokratët besojnë se ish kreu i Shtëpisë së Bardhë mund të aktivizojë votuesit në fazën përmbyllëse të fushatës.
Joe Bieden dhe Kamala Harris kanë shpresë se Obama do t’i ndihmojë të fitojnë 3 grupe kryesore; burrat me ngjyrë, komunitetin latin dhe votuesit e rinj.
Sfida mes dy kandidatëve kryesorë nuk është vetëm për votën e 3 nëntorit. Të dhënat zyrtare tregojnë se fushata e Biden ka grumbulluar më shumë fonde se ajo e Trump, gjë e cila i lejon demokratit që të shpenzojë më shumë për të bindur qytetarët në 3 shtete të rëndësishme si në Miçigan, Pensilani dhe Uiskonsin.
