Teksa ka shpërthyer festa në kampin republikan, Donald Trump ka mbërritur në West Palm Beach të Florida-s bashkë me Melanie. Ai është ngjitur në podium, si presidenti i 47-të i Shteteve të Bashkuara.
“Faleminderit shumë të gjithëve!”, ishte fjalia e tij e parë e pasuar me ovacione të shumta.
“Dua t’ju falenderoj të gjithëve, është diçka e madhe. Jemi mijëra miq në këtë fitore, është diçka që nuk e ka parë askush më parë. Është lëvizja politike më e mrekullueshme e të gjitha kohërave. Do të ndihmojmë vendin tonë, që ka nevojë për ndihmë. Do rregullojmë kufijtë tanë, do rregullojmë çdo gjë. E bëmë historinë për një arsye dhe ajo ka të bëjë me faktin se askush s’duhet të mendojë se ka gjëra të pamundura. Është fitore e madhe politike! Dua t’i falenderoj të gjithë shtetasit e Shteteve të Bashkuara për besimin e madh. Do punoj për ju, familjet tuaja, me çdo frymëmarrje të trupit tim. Do ndërtoj një të ardhme që meritoni ju në Shtetet e Bashkuara. Ta bëjmë Amerikën sërish të madhe! E dua shumë Karolinën e Veriut, Wisconsin…Kemi fituar në shumë shtete të tjera, rezultate të jashtëzakonshme për ne.“
“S’kishte rrugë tjetër përveç fitores! Kemi një votë popullore shumë të madhe”, tha ai në fjalimin e fitores. Theksojmë se ai ka marrë plot 68 milion vota.
“Do ndiheni me fat që do jeni pjesë e këtij udhëtimi. Ka një grup të madh pas presidentit të Shteteve të Bashkuara. Amerika na ka dhënë një fuqi shumë të madhe edhe me Senatin”, shtoi ai.
Në këtë moment kaq të rëndësishëm, nuk la pa falenderuar edhe bashkëshorten e tij, të cilës i dhuroi edhe një puthje. Fëmijët e tij, i cilësoi të mrekullueshëm. “Faleminderit që më keni qëndruar pranë!”
